bas ek KHata ki musalsal saza abhi tak hai

bas ik ḳhatā kī musalsal sazā abhī tak hai

mire ḳhilāf mirā ā.īna abhī tak hai

sabhī charāġh añdheroñ se mil ga.e lekin

harīf-e-mauj-e-havā ik diyā abhī tak hai

miTā sake na use hādsoñ ke dariyā bhī

vo ek naam jo dil par likhā abhī tak hai

girī hai merī jo dastār ġham huā lekin

ye shukr kartā huuñ band-e-qabā abhī tak hai

nazar uThā ke kahā mai-kade meñ saaqī ne

vo kaun hai jo yahāñ pārsā abhī tak hai

na jaane kaun se sadmoñ kā shor thā is meñ

guzar chukā vo idhar se sadā abhī tak hai

bas ek KHata ki musalsal saza abhi tak hai

mere KHilaf mera aaina abhi tak hai

sabhi charagh andheron se mil gae lekin

harif-e-mauj-e-hawa ek diya abhi tak hai

miTa sake na use hadson ke dariya bhi

wo ek nam jo dil par likha abhi tak hai

giri hai meri jo dastar gham hua lekin

ye shukr karta hun band-e-qaba abhi tak hai

nazar uTha ke kaha mai-kade mein saqi ne

wo kaun hai jo yahan parsa abhi tak hai

na jaane kaun se sadmon ka shor tha is mein

guzar chuka wo idhar se sada abhi tak hai