bas ek tasalsul-e-takrar-e-qurb-o-duri tha

bas ik tasalsul-e-takrār-e-qurb-o-dūrī thā

visāl o hijr kā har marhala ubūrī thā

mirī shikast bhī thī merī zaat se mansūb

ki merī fikr kā har faisla shu.ūrī thā

thī jiitī jāgtī duniyā mirī mohabbat kī

na ḳhvāb kā sā vo aalam ki lā-shu.ūrī thā

ta.alluqāt meñ aisā bhī ek moḌ aayā

ki qurbatoñ pe bhī dil ko gumān-e-dūrī thā

rivāyatoñ se kināra-kashī bhī lāzim thī

aur ehtirām-e-rivāyāt bhī zarūrī thā

mashīnī daur ke āzār se huā sābit

ki aadmī kā malāl aadmī se duurī thā

khulā hai kab koī jauhar hijāb meñ 'akbar'

guhar ke baab meñ tark-e-sadaf zarūrī thā

bas ek tasalsul-e-takrar-e-qurb-o-duri tha

visal o hijr ka har marhala uburi tha

meri shikast bhi thi meri zat se mansub

ki meri fikr ka har faisla shuuri tha

thi jiti jagti duniya meri mohabbat ki

na KHwab ka sa wo aalam ki la-shuuri tha

talluqat mein aisa bhi ek moD aaya

ki qurbaton pe bhi dil ko guman-e-duri tha

riwayaton se kinara-kashi bhi lazim thi

aur ehtiram-e-riwayat bhi zaruri tha

mashini daur ke aazar se hua sabit

ki aadmi ka malal aadmi se duri tha

khula hai kab koi jauhar hijab mein 'akbar'

guhar ke bab mein tark-e-sadaf zaruri tha