be-sahaaron ka intizam karo

be-sahāroñ kā intizām karo

yaanī ik aur qatl-e-ām karo

ḳhair-ḳhvāhoñ kā mashvara ye hai

Thokareñ khaao aur salām karo

dab ke rahnā hameñ nahīñ manzūr

zālimo jaao apnā kaam karo

ḳhvāhisheñ jaane kis taraf le jaa.eñ

ḳhvāhishoñ ko na be-lagām karo

mezbānoñ meñ ho jahāñ an-ban

aisī bastī meñ mat qayām karo

aap chhaT jā.eñge havas vaale

tum zarā be-ruḳhī ko aam karo

DhūñDte ho giroñ paḌoñ ko kyuuñ

uḌne vāloñ ko zer-e-dām karo

dene vaalā baḌā.ī bhī degā

tum samā.ī kā ehtimām karo

bad-duā de ke chal diyā vo faqīr

kah diyā thā ki koī kaam karo

ye hunar bhī baḌā zarūrī hai

kitnā jhuk kar kise salām karo

sar-phiroñ meñ abhī harārat hai

in jiyāloñ kā ehtirām karo

saañp aapas meñ kah rahe haiñ 'hafīz'

āstīnoñ kā intizām karo

be-sahaaron ka intizam karo

yani ek aur qatl-e-am karo

KHair-KHwahon ka mashwara ye hai

Thokaren khao aur salam karo

dab ke rahna hamein nahin manzur

zalimo jao apna kaam karo

KHwahishen jaane kis taraf le jaen

KHwahishon ko na be-lagam karo

mezbanon mein ho jahan an-ban

aisi basti mein mat qayam karo

aap chhaT jaenge hawas wale

tum zara be-ruKHi ko aam karo

DhunDte ho giron paDon ko kyun

uDne walon ko zer-e-dam karo

dene wala baDai bhi dega

tum samai ka ehtimam karo

bad-dua de ke chal diya wo faqir

kah diya tha ki koi kaam karo

ye hunar bhi baDa zaruri hai

kitna jhuk kar kise salam karo

sar-phiron mein abhi hararat hai

in jiyalon ka ehtiram karo

sanp aapas mein kah rahe hain 'hafiz'

aastinon ka intizam karo