be-tab hain aur ishq ka dawa nahin hum ko

be-tāb haiñ aur ishq kā da.avā nahīñ ham ko

āvāra haiñ aur dasht kā saudā nahīñ ham ko

ġhairoñ kī mohabbat pe yaqīñ aane lagā hai

yāroñ se agarche koī shikva nahīñ ham ko

nairañgī-e-dil hai ki taġhāful kā karishma

kyā baat hai jo terī tamannā nahīñ ham ko

yā tere alāva bhī kisī shai kī talab hai

yā apnī mohabbat pe bharosā nahīñ ham ko

yā tum bhī mudāvā-e-alam kar nahīñ sakte

yā chāragaro fikr-e-mudāvā nahīñ ham ko

yuuñ barhamī-e-kākul-e-imroz se ḳhush haiñ

jaise ki ḳhayāl-e-ruḳh-e-fardā nahīñ ham ko

be-tab hain aur ishq ka dawa nahin hum ko

aawara hain aur dasht ka sauda nahin hum ko

ghairon ki mohabbat pe yaqin aane laga hai

yaron se agarche koi shikwa nahin hum ko

nairangi-e-dil hai ki taghaful ka karishma

kya baat hai jo teri tamanna nahin hum ko

ya tere alawa bhi kisi shai ki talab hai

ya apni mohabbat pe bharosa nahin hum ko

ya tum bhi mudawa-e-alam kar nahin sakte

ya chaaragaro fikr-e-mudawa nahin hum ko

yun barhami-e-kakul-e-imroz se KHush hain

jaise ki KHayal-e-ruKH-e-farda nahin hum ko