bhed paen to rah-e-yar mein gum ho jaen

bhed paa.eñ to rah-e-yār meñ gum ho jaa.eñ

varna kis vāste be-kār meñ gum ho jaa.eñ

kyā kareñ arz-e-tamannā ki tujhe dekhte hī

lafz pairāya-e-iz.hār meñ gum ho jaa.eñ

ye na ho tum bhī kisī bhiiḌ meñ kho jaao kahīñ

ye na ho ham kisī bāzār meñ gum ho jaa.eñ

kis tarah tujh se kaheñ kitnā bhalā lagtā hai

tujh ko dekheñ tire dīdār meñ gum ho jaa.eñ

ham tire shauq meñ yuuñ ḳhud ko gañvā baiThe haiñ

jaise bachche kisī tyauhār meñ gum ho jaa.eñ

pech itne bhī na do kirmak-e-resham kī tarah

dekhnā sar hī na dastār meñ gum ho jaa.eñ

aisā āshob-e-zamāna hai ki Dar lagtā hai

dil ke mazmūñ hī na ash.ār meñ gum ho jaa.eñ

shahryāroñ ke bulāve bahut aate haiñ 'farāz'

ye na ho aap bhī darbār meñ gum ho jaa.eñ

bhed paen to rah-e-yar mein gum ho jaen

warna kis waste be-kar mein gum ho jaen

kya karen arz-e-tamanna ki tujhe dekhte hi

lafz pairaya-e-izhaar mein gum ho jaen

ye na ho tum bhi kisi bhiD mein kho jao kahin

ye na ho hum kisi bazar mein gum ho jaen

kis tarah tujh se kahen kitna bhala lagta hai

tujh ko dekhen tere didar mein gum ho jaen

hum tere shauq mein yun KHud ko ganwa baiThe hain

jaise bachche kisi tyauhaar mein gum ho jaen

pech itne bhi na do kirmak-e-resham ki tarah

dekhna sar hi na dastar mein gum ho jaen

aisa aashob-e-zamana hai ki Dar lagta hai

dil ke mazmun hi na ashaar mein gum ho jaen

shahryaron ke bulawe bahut aate hain 'faraaz'

ye na ho aap bhi darbar mein gum ho jaen