chaDhte dariya se bhi gar par utar jaoge

chaḌhte dariyā se bhī gar paar utar jāoge

paañv rakhte hī kināre pe bikhar jāoge

vaqt har moḌ pe dīvār khaḌī kar degā

vaqt kī qaid se ghabrā ke jidhar jāoge

ḳhāna-barbād samajh kar hameñ Dhaltī huī raat

tanz se pūchhtī hai kaun se ghar jāoge

sach kaho shaam kī āvāra havā ke jhoñko

us kī ḳhushbū ke ta'āqub meñ kidhar jāoge

aage baḌh jā.eñge phir donoñ hī chup chup yuuñ to

maiñ pukārūñgā tumheñ tum bhī Thahar jāoge

zabt-e-ehsās ke zindāñ se kahīñ bhaag chalo

aur kuchh der yahāñ Thahre to mar jāoge

naqsh-e-imroz se aage na nigāheñ dauḌāo

kal kī tasvīr jo dekhoge to Dar jāoge

maiñ bhī saaya huuñ siyah raat meñ kho jā.ūñgā

tum bhī ik ḳhvāb ho pal-bhar meñ bikhar jāoge

rāste shahr ke sab band hue haiñ tum par

ghar se nikloge to 'maḳhmūr' kidhar jāoge

chaDhte dariya se bhi gar par utar jaoge

panw rakhte hi kinare pe bikhar jaoge

waqt har moD pe diwar khaDi kar dega

waqt ki qaid se ghabra ke jidhar jaoge

KHana-barbaad samajh kar hamein Dhalti hui raat

tanz se puchhti hai kaun se ghar jaoge

sach kaho sham ki aawara hawa ke jhonko

us ki KHushbu ke ta'aqub mein kidhar jaoge

aage baDh jaenge phir donon hi chup chup yun to

main pukarunga tumhein tum bhi Thahar jaoge

zabt-e-ehsas ke zindan se kahin bhag chalo

aur kuchh der yahan Thahre to mar jaoge

naqsh-e-imroz se aage na nigahen dauDao

kal ki taswir jo dekhoge to Dar jaoge

main bhi saya hun siyah raat mein kho jaunga

tum bhi ek KHwab ho pal-bhar mein bikhar jaoge

raste shahr ke sab band hue hain tum par

ghar se nikloge to 'maKHmur' kidhar jaoge