chal pare haT mujhe na dikhla munh

chal pare haT mujhe na dikhlā muñh

ai shab-e-hijr terā kaalā muñh

ārzū-e-nazāra thī tū ne

itnī hī baat par chhupāyā muñh

dushmanoñ se bigaḌ ga.ī to bhī

dekhte hī mujhe banāyā muñh

baat puurī bhī muñh se niklī nahīñ

aap ne gāliyoñ pe kholā muñh

ho gayā rāz-e-'ishq be-parda

us ne parde se jo nikālā muñh

shab-e-ġham kā bayān kyā kījiye

hai baḌī baat aur chhoTā muñh

jab kahā yaar se dikhā sūrat

hañs ke bolā ki dekho apnā muñh

kis ko ḳhūn-e-jigar pilā.egā

sāġhar-e-mai ko kyuuñ lagāyā muñh

phir ga.ī aañkh misl-e-qibla-numā

jis taraf us sanam ne pherā muñh

ghar meñ baiThe the kuchh udaas se vo

bole bas dekhte hī merā muñh

ham bhī ġhamgīn se haiñ aaj kahīñ

sub.h uTThe the dekh terā muñh

sañg-e-asvad nahīñ hai chashm-e-butāñ

bosa 'momin' talab kare kyā muñh

chal pare haT mujhe na dikhla munh

ai shab-e-hijr tera kala munh

aarzu-e-nazara thi tu ne

itni hi baat par chhupaya munh

dushmanon se bigaD gai to bhi

dekhte hi mujhe banaya munh

baat puri bhi munh se nikli nahin

aap ne galiyon pe khola munh

ho gaya raaz-e-'ishq be-parda

us ne parde se jo nikala munh

shab-e-gham ka bayan kya kijiye

hai baDi baat aur chhoTa munh

jab kaha yar se dikha surat

hans ke bola ki dekho apna munh

kis ko KHun-e-jigar pilaega

saghar-e-mai ko kyun lagaya munh

phir gai aankh misl-e-qibla-numa

jis taraf us sanam ne phera munh

ghar mein baiThe the kuchh udas se wo

bole bas dekhte hi mera munh

hum bhi ghamgin se hain aaj kahin

subh uTThe the dekh tera munh

sang-e-aswad nahin hai chashm-e-butan

bosa 'momin' talab kare kya munh