chehra-e-zindagi nikhar aaya

chehra-e-zindagī nikhar aayā

jab kabhī ham ne jaam chhalkāyā

shām-e-hijrāñ bhī ik qayāmat thī

aap aa.e to mujh ko yaad aayā

rañg phīkā paḌā vafāoñ kā

aaj kuchh is tarah vo sharmāyā

yuuñ to be-chainiyāñ muqaddar thiiñ

terī qurbat ne aur taḌpāyā

kyā qayāmat vo kam-nigāhī thī

har haqīqat ko jis ne jhuThlāyā

kyā huī vo diloñ kī māsūmī

husn rūThā na ishq pachhtāyā

haa.e kis kis maqām par dil ko

us uchaTtī nazar ne bhaTkāyā

ḳhud-shanāsī thī justujū terī

tujh ko DhūñDā to aap ko paayā

'naqsh' āñkhoñ meñ aa ga.e aañsū

aaj aise meñ kaun yaad aayā

chehra-e-zindagi nikhar aaya

jab kabhi hum ne jam chhalkaya

sham-e-hijran bhi ek qayamat thi

aap aae to mujh ko yaad aaya

rang phika paDa wafaon ka

aaj kuchh is tarah wo sharmaya

yun to be-chainiyan muqaddar thin

teri qurbat ne aur taDpaya

kya qayamat wo kam-nigahi thi

har haqiqat ko jis ne jhuThlaya

kya hui wo dilon ki masumi

husn ruTha na ishq pachhtaya

hae kis kis maqam par dil ko

us uchaTti nazar ne bhaTkaya

KHud-shanasi thi justuju teri

tujh ko DhunDa to aap ko paya

'naqsh' aankhon mein aa gae aansu

aaj aise mein kaun yaad aaya