chhat pe badli jhuki si rahti hai

chhat pe badlī jhukī sī rahtī hai

kab se bārish thamī sī rahtī hai

koī shab dhuup kī sī kaifiyyat

koī din chāñdnī sī rahtī hai

ek hastī mirī anāsir chaar

har taraf se ghirī sī rahtī hai

kaise jī-bhar ke dekhiye us ko

dekhne meñ kamī sī rahtī hai

koī ik zā.iqa nahīñ miltā

ġham meñ shāmil ḳhushī sī rahtī hai

jab se maa.il hue haiñ mere qadam

raah mujh se khiñchī sī rahtī hai

ik na ik shaġhl chāhiye us ko

mujh meñ dīvāngī sī rahtī hai

tiir añdhere meñ jab chalātā huuñ

dhyān meñ raushnī sī rahtī hai

shāḳh-e-ummīd ko ḳhizāñ na bahār

ye sab din harī sī rahtī hai

ek ḳhitte ke bojh se raahī

saarī duniyā dabī sī rahtī hai

chhat pe badli jhuki si rahti hai

kab se barish thami si rahti hai

koi shab dhup ki si kaifiyyat

koi din chandni si rahti hai

ek hasti meri anasir chaar

har taraf se ghiri si rahti hai

kaise ji-bhar ke dekhiye us ko

dekhne mein kami si rahti hai

koi ek zaiqa nahin milta

gham mein shamil KHushi si rahti hai

jab se mail hue hain mere qadam

rah mujh se khinchi si rahti hai

ek na ek shaghl chahiye us ko

mujh mein diwangi si rahti hai

tir andhere mein jab chalata hun

dhyan mein raushni si rahti hai

shaKH-e-ummid ko KHizan na bahaar

ye sab din hari si rahti hai

ek KHitte ke bojh se rahi

sari duniya dabi si rahti hai