chup-chap habs-e-waqt ke pinjre mein mar gaya

chup-chāp habs-e-vaqt ke piñjre meñ mar gayā

jhoñkā havā kā aate hī kamre meñ mar gayā

sūraj lihāf oḌh ke soyā tamām raat

sardī se ik parinda darīche meñ mar gayā

jo nāḳhudā ko kah na sakā 'umr bhar ḳhudā

vo shaḳhs kal anā ke jazīre meñ mar gayā

editorī ne kaaT diiñ taḳhlīq kī rageñ

achchhā-bhalā adiib risāle meñ mar gayā

sūraj ne āñsuoñ kī tavānā.ī chhīn lī

shabnam sā shaḳhs dhuup ke qasbe meñ mar gayā

is martaba bhī sachchī gavāhī usī ne dī

is martaba magar vo kaTahre meñ mar gayā

'nāsik' vo apnī zaat meñ manzil se kam na thā

vo rah-rav-e-hayāt jo raste meñ mar gayā

chup-chap habs-e-waqt ke pinjre mein mar gaya

jhonka hawa ka aate hi kamre mein mar gaya

suraj lihaf oDh ke soya tamam raat

sardi se ek parinda dariche mein mar gaya

jo naKHuda ko kah na saka 'umr bhar KHuda

wo shaKHs kal ana ke jazire mein mar gaya

editori ne kaT din taKHliq ki ragen

achchha-bhala adib risale mein mar gaya

suraj ne aansuon ki tawanai chhin li

shabnam sa shaKHs dhup ke qasbe mein mar gaya

is martaba bhi sachchi gawahi usi ne di

is martaba magar wo kaTahre mein mar gaya

'nasik' wo apni zat mein manzil se kam na tha

wo rah-raw-e-hayat jo raste mein mar gaya