dalan mein kabhi kabhi chhat par khaDa hun main

dālān meñ kabhī kabhī chhat par khaḌā huuñ maiñ

sāyoñ ke intizār meñ shab bhar khaḌā huuñ maiñ

kyā ho gayā ki baiTh ga.ī ḳhaak bhī mirī

kyā baat hai ki apne hī uupar khaḌā huuñ maiñ

phailā huā hai sāmne sahrā-e-be-kanār

āñkhoñ meñ apnī le ke samundar khaḌā huuñ maiñ

sannāTā mere chāroñ taraf hai bichhā huā

bas dil kī dhaḌkanoñ ko pakaḌ kar khaḌā huuñ maiñ

soyā huā hai mujh meñ koī shaḳhs aaj raat

lagtā hai apne jism se bāhar khaḌā huuñ maiñ

ik haath meñ hai ā.īna-e-zāt-o-kā.enāt

ik haath meñ liye hue patthar khaḌā huuñ maiñ

dalan mein kabhi kabhi chhat par khaDa hun main

sayon ke intizar mein shab bhar khaDa hun main

kya ho gaya ki baiTh gai KHak bhi meri

kya baat hai ki apne hi upar khaDa hun main

phaila hua hai samne sahra-e-be-kanar

aankhon mein apni le ke samundar khaDa hun main

sannaTa mere chaaron taraf hai bichha hua

bas dil ki dhaDkanon ko pakaD kar khaDa hun main

soya hua hai mujh mein koi shaKHs aaj raat

lagta hai apne jism se bahar khaDa hun main

ek hath mein hai aaina-e-zat-o-kaenat

ek hath mein liye hue patthar khaDa hun main