danton se jabki us gul-e-tar ke dabae honTh

dāñtoñ se jabki us gul-e-tar ke dabā.e hoñTh

bolā ki sāhab apne se samjho parā.e hoñTh

us ġhairat-qamar ke agar dekh paa.e hoñTh

la.al-e-yaman bhī rashk se apnā chabā.e hoñTh

phūloñ se us ke jabki chaman meñ milā.e hoñTh

nāzuk ziyāda rag se saman ke bhī paa.e hoñTh

samjhā maiñ ḳhizr-e-chashma-e-āb-e-hayāt huuñ

hoñThoñ se mere us ne jo apne milā.e hoñTh

māñgā jo bosa yaar se maiñ ne shab-e-visāl

az-ḳhud maze meñ aa ke mire kaaT khaa.e hoñTh

kyā kyā sifat zabān se sausan kī bhī sunī

mal kar misī chaman meñ jo us ne dikhā.e hoñTh

surḳhī ne un laboñ kī kiyā āshiqoñ kā ḳhuun

laalī jamī jo paT ke to kyā rañg laa.e hoñTh

hoñThoñ meñ daab kar jo gilaurī dī yaar ne

kyā daañt piise ġhairoñ ne kyā kyā chabā.e hoñTh

paanī bhar aa.e misriyoñ ke muñh meñ vaqt-e-dīd

shīrīñ kī raal Tapke jo vo dekh paa.e hoñTh

dam aa gayā laboñ pe ye Dahkāyā yaar ne

sau baar paas hoñThoñ ke lā kar haTā.e hoñTh

shīrīñ-labī to dekhnā vo neshkar banī

quliyāñ kī nai se us ne jo apne lagā.e hoñTh

bose dahan ke is ke nahīñ bhūlte 'qalaq'

kahtā huuñ haa.e daañt kabhī gaah haa.e hoñTh

danton se jabki us gul-e-tar ke dabae honTh

bola ki sahab apne se samjho parae honTh

us ghairat-qamar ke agar dekh pae honTh

lal-e-yaman bhi rashk se apna chabae honTh

phulon se us ke jabki chaman mein milae honTh

nazuk ziyaada rag se saman ke bhi pae honTh

samjha main KHizr-e-chashma-e-ab-e-hayat hun

honThon se mere us ne jo apne milae honTh

manga jo bosa yar se main ne shab-e-visal

az-KHud maze mein aa ke mere kaT khae honTh

kya kya sifat zaban se sausan ki bhi suni

mal kar misi chaman mein jo us ne dikhae honTh

surKHi ne un labon ki kiya aashiqon ka KHun

lali jami jo paT ke to kya rang lae honTh

honThon mein dab kar jo gilauri di yar ne

kya dant pise ghairon ne kya kya chabae honTh

pani bhar aae misriyon ke munh mein waqt-e-did

shirin ki ral Tapke jo wo dekh pae honTh

dam aa gaya labon pe ye Dahkaya yar ne

sau bar pas honThon ke la kar haTae honTh

shirin-labi to dekhna wo neshkar bani

quliyan ki nai se us ne jo apne lagae honTh

bose dahan ke is ke nahin bhulte 'qalaq'

kahta hun hae dant kabhi gah hae honTh