dahr ke andhe kuen mein kas ke aawaza laga

dahr ke andhe kueñ meñ kas ke āvāza lagā

koī patthar pheñk kar paanī kā andāza lagā

zehn meñ sochoñ kā sūraj barf kī sūrat na rakh

kohr ke dīvār-o-dar par dhuup kā ġhāza lagā

raat bhī ab jā rahī hai apnī manzil kī taraf

kis kī dhun meñ jāgtā hai ghar kā darvāza lagā

kāñch ke bartan meñ jaise surḳh kāġhaz kā gulāb

vo mujhe itnā hī achchhā aur tar-o-tāza lagā

pyaar karne bhī na paayā thā ki rusvā.ī milī

jurm se pahle hī mujh ko sañg-e-ḳhamyāza lagā

shahr kī saḌkoñ par andhī raat ke pichhle-pahar

merā hī saaya mujhe rañgoñ kā shīrāza lagā

jaane rahtā hai kahāñ 'iqbāl-sājid' aaj kal

raat din dekhā hai us ke ghar kā darvāza lagā

dahr ke andhe kuen mein kas ke aawaza laga

koi patthar phenk kar pani ka andaza laga

zehn mein sochon ka suraj barf ki surat na rakh

kohr ke diwar-o-dar par dhup ka ghaza laga

raat bhi ab ja rahi hai apni manzil ki taraf

kis ki dhun mein jagta hai ghar ka darwaza laga

kanch ke bartan mein jaise surKH kaghaz ka gulab

wo mujhe itna hi achchha aur tar-o-taza laga

pyar karne bhi na paya tha ki ruswai mili

jurm se pahle hi mujh ko sang-e-KHamyaza laga

shahr ki saDkon par andhi raat ke pichhle-pahar

mera hi saya mujhe rangon ka shiraaza laga

jaane rahta hai kahan 'iqbaal-sajid' aaj kal

raat din dekha hai us ke ghar ka darwaza laga