تیرا خدا ہے جو کہ ترے سے جدا نہیں

تیرا خدا ہے جو کہ ترے سے جدا نہیں

جو کوئی جدا ہے تجھ سے او تیرا خدا نہیں

ہے آفتاب روز سے یک دم نہیں جدا

گر ہو جدا تو جان وہ شمس الضحیٰ نہیں

تیرا نبی نہیں ہے ترے سے علیٰحدہ

جو ہے علیٰحدہ وہ پیمبر ترا نہیں

جیسا کہ اصل چھاؤں سے یک دم نہیں جدا

گر ہو جدا تو اصل اوس چھاؤں کا نہیں

جو رہنما ترا ہے ترے ساتھ ہے مدام

گر ہو نہ تیرے ساتھ ترا رہنما نہیں

بیدلؔ کے ساتھ جو کہ رہے دل ربا مدام

نا ہو اگر وہ ساتھ ترا دل ربا نہیں

کہتے ہیں جس کو خلق محمد وہ ہے خدا

یعنی خدا جدا و محمد جدا نہیں