damak raha tha bahut yun to pairahan us ka

damak rahā thā bahut yuuñ to pairahan us kā

zarā se lams ne raushan kiyā badan us kā

vo ḳhaak uḌāne pe aa.e to saare dasht us ke

chale gudāz-qadam to chaman chaman us kā

vo jhuuT sach se pare raat kuchh sunātā thā

diloñ meñ raast utartā gayā suḳhan us kā

ajiib āb-o-havā kā vo rahne vaalā hai

milegā ḳhvāb o ḳhalā meñ kahīñ vatan us kā

tirī taraf se na kyā kyā sitam hue us par

maiñ jāntā huuñ bahut dost bhī na ban us kā

vo roz shaam se sham.eñ dhuāñ dhuāñ us kī

vo roz sub.h ujālā kiran kiran us kā

mirī nazar meñ hai mahfūz aaj bhī 'bānī'

badan kasā huā malbūs be-shikan us kā

damak raha tha bahut yun to pairahan us ka

zara se lams ne raushan kiya badan us ka

wo KHak uDane pe aae to sare dasht us ke

chale gudaz-qadam to chaman chaman us ka

wo jhuT sach se pare raat kuchh sunata tha

dilon mein rast utarta gaya suKHan us ka

ajib aab-o-hawa ka wo rahne wala hai

milega KHwab o KHala mein kahin watan us ka

teri taraf se na kya kya sitam hue us par

main jaanta hun bahut dost bhi na ban us ka

wo roz sham se shamen dhuan dhuan us ki

wo roz subh ujala kiran kiran us ka

meri nazar mein hai mahfuz aaj bhi 'bani'

badan kasa hua malbus be-shikan us ka