Dar Dar ke jise main sun raha hun

Dar Dar ke jise maiñ sun rahā huuñ

khoī huī apnī hī sadā huuñ

har lamha-e-hijr ik sadī thā

pūchho na ki kab se jī rahā huuñ

jab aañkh meñ aa ga.e haiñ aañsū

ḳhud bazm-e-tarab se uTh gayā huuñ

chhaTtī nahīñ ḳhū-e-haq-shanāsī

suqrāt huuñ zahr pī rahā huuñ

rahbar kī nahīñ mujhe zarūrat

har raah kā moḌ jāntā huuñ

manzil na milī to ġham nahīñ hai

apne ko to kho ke pā gayā huuñ

apnī hī havas thī sar-kashīda

dāman se ulajh ke gir paḌā huuñ

uryāni-e-fikr khul na jaa.e

ḳhvāboñ ke libās sī rahā huuñ

har manzil-e-marg-āfrīñ meñ

sar-gashta-e-zindagī rahā huuñ

dhabbe haiñ bahut se tīrgī ke

kin raushniyoñ meñ ghir gayā huuñ

Dar Dar ke jise main sun raha hun

khoi hui apni hi sada hun

har lamha-e-hijr ek sadi tha

puchho na ki kab se ji raha hun

jab aankh mein aa gae hain aansu

KHud bazm-e-tarab se uTh gaya hun

chhaTti nahin KHu-e-haq-shanasi

suqraat hun zahr pi raha hun

rahbar ki nahin mujhe zarurat

har rah ka moD jaanta hun

manzil na mili to gham nahin hai

apne ko to kho ke pa gaya hun

apni hi hawas thi sar-kashida

daman se ulajh ke gir paDa hun

uryani-e-fikr khul na jae

KHwabon ke libas si raha hun

har manzil-e-marg-afrin mein

sar-gashta-e-zindagi raha hun

dhabbe hain bahut se tirgi ke

kin raushniyon mein ghir gaya hun