Dar ke kisi se chhup jata hai jaise sanp KHazane mein

Dar ke kisī se chhup jaatā hai jaise saañp ḳhazāne meñ

zar ke zor se zinda haiñ sab ḳhaak ke is vīrāne meñ

jaise rasm adā karte hoñ shahroñ kī ābādī meñ

sub.h ko ghar se duur nikal kar shaam ko vāpas aane meñ

niile rang meñ Duubī āñkheñ khulī paḌī thiiñ sabze par

'aks paḌā thā āsmān kā shāyad is paimāne meñ

dabī huī hai zer-e-zamīñ ik dahshat gung sadāoñ kī

bijlī sī kahīñ laraz rahī hai kisī chhupe tah-ḳhāne meñ

dil kuchh aur bhī sard huā hai shām-e-shahr kī raunaq se

kitnī ziyā be-sūd ga.ī shīshe ke lafz jalāne meñ

maiñ to 'munīr' ā.īne meñ ḳhud ko tak kar hairān huā

ye chehra kuchh aur tarah thā pahle kisī zamāne meñ

Dar ke kisi se chhup jata hai jaise sanp KHazane mein

zar ke zor se zinda hain sab KHak ke is virane mein

jaise rasm ada karte hon shahron ki aabaadi mein

subh ko ghar se dur nikal kar sham ko wapas aane mein

nile rang mein Dubi aankhen khuli paDi thin sabze par

'aks paDa tha aasman ka shayad is paimane mein

dabi hui hai zer-e-zamin ek dahshat gung sadaon ki

bijli si kahin laraz rahi hai kisi chhupe tah-KHane mein

dil kuchh aur bhi sard hua hai sham-e-shahr ki raunaq se

kitni ziya be-sud gai shishe ke lafz jalane mein

main to 'munir' aaine mein KHud ko tak kar hairan hua

ye chehra kuchh aur tarah tha pahle kisi zamane mein