dast-e-KHirad se parda-kushai na ho saki

dast-e-ḳhirad se parda-kushā.ī na ho sakī

husn-e-azal kī jalva-numā.ī na ho sakī

rañg-e-bahār de na sake ḳhārzār ko

dast-e-junūñ meñ ābla-sā.ī na ho sakī

ai dil tujhe ijāzat-e-fariyād hai magar

rusvā.ī hai agar shunavā.ī na ho sakī

mandir bhī saaf ham ne kiye masjideñ bhī paak

mushkil ye hai ki dil kī safā.ī na ho sakī

fikr-e-ma.āsh o ishq-e-butāñ yād-e-raftagāñ

in mushkiloñ se ahd-bar.ā.ī na ho sakī

ġhāfil na tujh se ai ġham-e-uqbā the ham magar

dām-e-ġham-e-jahāñ se rihā.ī na ho sakī

munkir hazār baar ḳhudā se huā bashar

ik baar bhī bashar se ḳhudā.ī na ho sakī

ḳhud zindagī burā.ī nahīñ hai to aur kyā

'mahrūm' jab kisī se bhalā.ī na ho sakī

dast-e-KHirad se parda-kushai na ho saki

husn-e-azal ki jalwa-numai na ho saki

rang-e-bahaar de na sake KHarzar ko

dast-e-junun mein aabla-sai na ho saki

ai dil tujhe ijazat-e-fariyaad hai magar

ruswai hai agar shunawai na ho saki

mandir bhi saf hum ne kiye masjiden bhi pak

mushkil ye hai ki dil ki safai na ho saki

fikr-e-maash o ishq-e-butan yaad-e-raftagan

in mushkilon se ahd-barai na ho saki

ghafil na tujh se ai gham-e-uqba the hum magar

dam-e-gham-e-jahan se rihai na ho saki

munkir hazar bar KHuda se hua bashar

ek bar bhi bashar se KHudai na ho saki

KHud zindagi burai nahin hai to aur kya

'mahrum' jab kisi se bhalai na ho saki