dayar-e-zat mein jab KHamushi mahsus hoti hai

dayār-e-zāt meñ jab ḳhāmushī mahsūs hotī hai

to har āvāz jaise gūñjtī mahsūs hotī hai

maiñ thoḌī der bhī āñkhoñ ko apnī band kar luuñ to

añdheroñ meñ mujhe ik raushnī mahsūs hotī hai

sunā thā maiñ ne ye to pattharoñ kā shahr hai lekin

yahāñ to pattharoñ meñ zindagī mahsūs hotī hai

tasavvur meñ tirī tasvīr maiñ jab bhī banātā huuñ

mujhe har baar rañgoñ kī kamī mahsūs hotī hai

jise sochoñ ne Dhālā ho ḳhayāloñ ne tarāshā ho

vo chehra dekh kar kitnī ḳhushī mahsūs hotī hai

yahī bedāriyāñ haiñ jo mujhe sone nahīñ detīñ

inhīñ bedāriyoñ meñ niiñd bhī mahsūs hotī hai

ye ab maiñ āgahī kī kaun sī manzil pe aa pahuñchā

mujhe sairābiyoñ meñ tishnagī mahsūs hotī hai

dayar-e-zat mein jab KHamushi mahsus hoti hai

to har aawaz jaise gunjti mahsus hoti hai

main thoDi der bhi aankhon ko apni band kar lun to

andheron mein mujhe ek raushni mahsus hoti hai

suna tha main ne ye to pattharon ka shahr hai lekin

yahan to pattharon mein zindagi mahsus hoti hai

tasawwur mein teri taswir main jab bhi banata hun

mujhe har bar rangon ki kami mahsus hoti hai

jise sochon ne Dhaala ho KHayalon ne tarasha ho

wo chehra dekh kar kitni KHushi mahsus hoti hai

yahi bedariyan hain jo mujhe sone nahin detin

inhin bedariyon mein nind bhi mahsus hoti hai

ye ab main aagahi ki kaun si manzil pe aa pahuncha

mujhe sairabiyon mein tishnagi mahsus hoti hai