dekhen aaine ke manind sahen gham ki tarah

dekheñ ā.īne ke mānind saheñ ġham kī tarah

ham ki haiñ bazm-e-gul-o-lāla meñ shabnam kī tarah

vaqt be-mehr hai is fursat-e-kamyāb meñ tum

merī āñkhoñ meñ raho ḳhvāb-e-mujassam kī tarah

arsa-e-umr meñ kyā kyā na ruteñ aa.iiñ magar

koī Thahrī na yahāñ dard ke mausam kī tarah

kis tarah us se kahūñ zaḳhm bhī haiñ us kī atā

haath jis kā mire siine pe hai marham kī tarah

maiñ ne chāhā thā ki ik jast meñ pahuñchūñ lekin

raah meñ sañg the albatta o tāham kī tarah

terā ehsāñ hai ki shādāb rahā kunj-e-ḳhayāl

dil-e-pur-ḳhūñ kī tarah dīda-e-pur-nam kī tarah

us kī guftār ne chhoḌā na kahīñ kā ham ko

zā.iqa shahd sā thā aur asar sam kī tarah

log taslīm se taḳhrīb tak aa pahuñche haiñ

Dālne nikle haiñ ik aur hī aalam kī tarah

sa.ī-e-iz.hār 'ziyā' kāñch ke TuuTe hue lafz

ārzūeñ haiñ kisī mahfil-e-barham kī tarah

dekhen aaine ke manind sahen gham ki tarah

hum ki hain bazm-e-gul-o-lala mein shabnam ki tarah

waqt be-mehr hai is fursat-e-kamyab mein tum

meri aankhon mein raho KHwab-e-mujassam ki tarah

arsa-e-umr mein kya kya na ruten aain magar

koi Thahri na yahan dard ke mausam ki tarah

kis tarah us se kahun zaKHm bhi hain us ki ata

hath jis ka mere sine pe hai marham ki tarah

main ne chaha tha ki ek jast mein pahunchun lekin

rah mein sang the albatta o taham ki tarah

tera ehsan hai ki shadab raha kunj-e-KHayal

dil-e-pur-KHun ki tarah dida-e-pur-nam ki tarah

us ki guftar ne chhoDa na kahin ka hum ko

zaiqa shahd sa tha aur asar sam ki tarah

log taslim se taKHrib tak aa pahunche hain

Dalne nikle hain ek aur hi aalam ki tarah

sai-e-izhaar 'ziya' kanch ke TuTe hue lafz

aarzuen hain kisi mahfil-e-barham ki tarah