dekhna bhi to unhen dur se dekha karna

dekhnā bhī to unheñ duur se dekhā karnā

sheva-e-ishq nahīñ husn ko rusvā karnā

ik nazar bhī tirī kaafī thī pa-e-rāhat-e-jāñ

kuchh bhī dushvār na thā mujh ko shakebā karnā

un ko yaañ vaade pe aa lene de ai abr-e-bahār

jis qadar chāhnā phir baad meñ barsā karnā

shaam ho yā ki sahar yaad unhīñ kī rakhnī

din ho yā raat hameñ zikr unhīñ kā karnā

saum zāhid ko mubārak rahe aabid ko salāt

āsiyoñ ko tirī rahmat pe bharosā karnā

āshiqo husn-e-jafākār kā shikva hai gunāh

tum ḳhabardār ḳhabardār na aisā karnā

kuchh samajh meñ nahīñ aatā ki ye kyā hai 'hasrat'

un se mil kar bhī na iz.hār-e-tamannā karnā

dekhna bhi to unhen dur se dekha karna

shewa-e-ishq nahin husn ko ruswa karna

ek nazar bhi teri kafi thi pa-e-rahat-e-jaan

kuchh bhi dushwar na tha mujh ko shakeba karna

un ko yan wade pe aa lene de ai abr-e-bahaar

jis qadar chahna phir baad mein barsa karna

sham ho ya ki sahar yaad unhin ki rakhni

din ho ya raat hamein zikr unhin ka karna

saum zahid ko mubarak rahe aabid ko salat

aasiyon ko teri rahmat pe bharosa karna

aashiqo husn-e-jafakar ka shikwa hai gunah

tum KHabardar KHabardar na aisa karna

kuchh samajh mein nahin aata ki ye kya hai 'hasrat'

un se mil kar bhi na izhaar-e-tamanna karna