diwar pe rakkha hua miTTi ka diya main

dīvār pe rakkhā huā miTTī kā diyā maiñ

sab kuchh kahā aur raat se kuchh bhī na kahā maiñ

kuchh aur bhī maskan the mire dil ke alāva

lagtā hai kahīñ aur bhī mismār huā maiñ

is dukh ko to maiñ Thiik batā bhī nahīñ paatā

maiñ ḳhud ko mayassar thā magar mil na sakā maiñ

jaagā huuñ magar ḳhvāb kī dahshat nahīñ jaatī

kyā dekhtā huuñ yaar tujhe bhuul gayā maiñ

sūraj ke ufuq hote haiñ manzil nahīñ hotī

so Dhaltā rahā jaltā rahā chaltā rahā maiñ

ik ishq-qabīla mirī miTTī meñ chhupā thā

ik shaḳhs thā lekin koī ik shaḳhs na thā maiñ

ik ghūñT kī vaq.at mire pindār se kam thī

is baat se vāqif mirā mashkīza hai yā maiñ

ik jism meñ rahte hue ham duur bahut the

āñkheñ na khulīñ mujh pe na āñkhoñ pe khulā maiñ

kuchh aur bhī darkār thā sab kuchh ke alāva

kyā hogā jise DhūñDtā thā tere sivā maiñ

diwar pe rakkha hua miTTi ka diya main

sab kuchh kaha aur raat se kuchh bhi na kaha main

kuchh aur bhi maskan the mere dil ke alawa

lagta hai kahin aur bhi mismar hua main

is dukh ko to main Thik bata bhi nahin pata

main KHud ko mayassar tha magar mil na saka main

jaga hun magar KHwab ki dahshat nahin jati

kya dekhta hun yar tujhe bhul gaya main

suraj ke ufuq hote hain manzil nahin hoti

so Dhalta raha jalta raha chalta raha main

ek ishq-qabila meri miTTi mein chhupa tha

ek shaKHs tha lekin koi ek shaKHs na tha main

ek ghunT ki waqat mere pindar se kam thi

is baat se waqif mera mashkiza hai ya main

ek jism mein rahte hue hum dur bahut the

aankhen na khulin mujh pe na aankhon pe khula main

kuchh aur bhi darkar tha sab kuchh ke alawa

kya hoga jise DhunDta tha tere siwa main