dil-e-mayus mein wo shorishen barpa nahin hotin

dil-e-māyūs meñ vo shorisheñ barpā nahīñ hotīñ

umīdeñ is qadar TūTīñ ki ab paidā nahīñ hotīñ

mirī betābiyāñ bhī juzv haiñ ik merī hastī kī

ye zāhir hai ki maujeñ ḳhārij az dariyā nahīñ hotīñ

vahī pariyāñ haiñ ab bhī raajā indar ke akhāḌe meñ

magar shahzāda-e-gulfām par shaidā nahīñ hotīñ

yahāñ kī auratoñ ko ilm kī parvā nahīñ be-shak

magar ye shauharoñ se apne be-parvā nahīñ hotīñ

ta.alluq dil kā kyā baaqī maiñ rakkhūñ bazm-e-duniyā se

vo dilkash sūrateñ ab anjuman-ārā nahīñ hotīñ

huā huuñ is qadar afsurda rañg-e-bāġh-e-hastī se

havā.eñ fasl-e-gul kī bhī nashāt-afzā nahīñ hotīñ

qazā ke sāmne be-kār hote haiñ havās 'akbar'

khulī hotī haiñ go āñkheñ magar biinā nahīñ hotīñ

dil-e-mayus mein wo shorishen barpa nahin hotin

umiden is qadar TuTin ki ab paida nahin hotin

meri betabiyan bhi juzw hain ek meri hasti ki

ye zahir hai ki maujen KHarij az dariya nahin hotin

wahi pariyan hain ab bhi raja indar ke akhaDe mein

magar shahzada-e-gulfam par shaida nahin hotin

yahan ki auraton ko ilm ki parwa nahin be-shak

magar ye shauharon se apne be-parwa nahin hotin

talluq dil ka kya baqi main rakkhun bazm-e-duniya se

wo dilkash suraten ab anjuman-ara nahin hotin

hua hun is qadar afsurda rang-e-bagh-e-hasti se

hawaen fasl-e-gul ki bhi nashat-afza nahin hotin

qaza ke samne be-kar hote hain hawas 'akbar'

khuli hoti hain go aankhen magar bina nahin hotin