dil ko rone ke liye aankh mein bas pani hai

dil ko rone ke liye aañkh meñ bas paanī hai

ālam-e-zāt meñ kyā be-sar-o-sāmānī hai

tishna-lab aisā ki hoñToñ pe paḌe haiñ chhāle

mutma.in aisā huuñ dariyā ko bhī hairānī hai

ab ki mumkin hai zamīñ ḳhuun kī pyāsī na rahe

ik qabīle ne mirī baat nahīñ maanī hai

peḌ ke baa'd parindoñ ne bhī par kaaT liye

az-zamīñ tā-ba-falak sog hai vīrānī hai

vo jo laḌkī hai nā kapḌe nahīñ chhoTe us ke

dekhne vaale tirī aañkh meñ 'uryānī hai

hālat-e-dil pe parindoñ ne bhī nauha likkhā

chhoḌne vaale batā tujh ko pashemānī hai

dil ko rone ke liye aankh mein bas pani hai

aalam-e-zat mein kya be-sar-o-samani hai

tishna-lab aisa ki honTon pe paDe hain chhaale

mutmain aisa hun dariya ko bhi hairani hai

ab ki mumkin hai zamin KHun ki pyasi na rahe

ek qabile ne meri baat nahin mani hai

peD ke ba'd parindon ne bhi par kaT liye

az-zamin ta-ba-falak sog hai virani hai

wo jo laDki hai na kapDe nahin chhoTe us ke

dekhne wale teri aankh mein 'uryani hai

haalat-e-dil pe parindon ne bhi nauha likkha

chhoDne wale bata tujh ko pashemani hai