dil mein rakkhe hue aankhon mein basae hue shaKHs

dil meñ rakkhe hue āñkhoñ meñ basā.e hue shaḳhs

paas se dekh mujhe duur se aa.e hue shaḳhs

jāntā huuñ ye mulāqāt zarā der kī hai

taptī rāhoñ meñ ḳhunuk chhāñv khilā.e hue shaḳhs

tere lab par tire ruḳhsār kī lau paḌtī hai

tāb-e-ḳhurshīd se mahtāb jalā.e hue shaḳhs

ye to duniyā bhī nahīñ hai ki kinārā kar le

tū kahāñ jā.egā ai dil ke satā.e hue shaḳhs

dhuup ranjish kī tarah phail rahī hai mujh meñ

kyā kahūñ tujh se mire saa.e meñ aa.e hue shaḳhs

munhadim hote hue vaqt se pūchho to 'sa.ūd'

kyā hue vo tire hāthoñ ke banā.e hue shaḳhs

dil mein rakkhe hue aankhon mein basae hue shaKHs

pas se dekh mujhe dur se aae hue shaKHs

jaanta hun ye mulaqat zara der ki hai

tapti rahon mein KHunuk chhanw khilae hue shaKHs

tere lab par tere ruKHsar ki lau paDti hai

tab-e-KHurshid se mahtab jalae hue shaKHs

ye to duniya bhi nahin hai ki kinara kar le

tu kahan jaega ai dil ke satae hue shaKHs

dhup ranjish ki tarah phail rahi hai mujh mein

kya kahun tujh se mere sae mein aae hue shaKHs

munhadim hote hue waqt se puchho to 'saud'

kya hue wo tere hathon ke banae hue shaKHs