dil se ya gulsitan se aati hai

dil se yā gulsitāñ se aatī hai

terī ḳhushbū kahāñ se aatī hai

kitnī maġhrūr hai nasīm-e-sahar

shāyad us āstāñ se aatī hai

ḳhud vahī mīr-e-kārvāñ to nahīñ

bū-e-ḳhush kārvāñ se aatī hai

un ke qāsid kā muntazir huuñ maiñ

ai ajal! tū kahāñ se aatī hai

shikva kaisā ki har balā ai dost!

jāntā huuñ jahāñ se aatī hai

ho chukīñ āzmā.isheñ itnī

sharm ab imtihāñ se aatī hai

ain dīvāngī meñ yaad āyā!

aql ishq-e-butāñ se aatī hai

terī āvāz gaah gaah ai dost!

parda-e-sāz-e-jāñ se aatī hai

dil se mat sarsarī guzar ki 'ra.īs'

ye zamīñ āsmāñ se aatī hai

dil se ya gulsitan se aati hai

teri KHushbu kahan se aati hai

kitni maghrur hai nasim-e-sahar

shayad us aastan se aati hai

KHud wahi mir-e-karwan to nahin

bu-e-KHush karwan se aati hai

un ke qasid ka muntazir hun main

ai ajal! tu kahan se aati hai

shikwa kaisa ki har bala ai dost!

jaanta hun jahan se aati hai

ho chukin aazmaishen itni

sharm ab imtihan se aati hai

ain diwangi mein yaad aaya!

aql ishq-e-butan se aati hai

teri aawaz gah gah ai dost!

parda-e-saz-e-jaan se aati hai

dil se mat sarsari guzar ki 'rais'

ye zamin aasman se aati hai