gunahon se nashw-o-numa pa gaya dil

gunāhoñ se nashv-o-numā pā gayā dil

dar-e-puḳhta-kārī pe pahuñchā gayā dil

agar zindagī muḳhtasar thī to phir kyā

isī meñ bahut aish kartā gayā dil

ye nannhī sī vus.at ye nādān hastī

na.e se nayā bhed kahtā gayā dil

na thā koī ma.abūd par rafta rafta

ḳhud apnā hī ma.abūd bantā gayā dil

nahīñ girya o ḳhanda meñ farq koī

jo rotā gayā dil to hañstā gayā dil

bajā.e dil ik talḳh aañsū rahegā

agar un kī mahfil meñ aayā gayā dil

pareshāñ rahā aap to fikr kyā hai

milā jis se bhī us ko bahlā gayā dil

ka.ī raaz pinhāñ haiñ lekin khuleñge

agar hashr ke roz pakḌā gayā dil

bahut ham bhī chālāk bante the lekin

hameñ bātoñ bātoñ meñ bahkā gayā dil

kahī baat jab kaam kī 'mīrā-jī' ne

vahīñ baat ko jhaT se palTā gayā dil

gunahon se nashw-o-numa pa gaya dil

dar-e-puKHta-kari pe pahuncha gaya dil

agar zindagi muKHtasar thi to phir kya

isi mein bahut aish karta gaya dil

ye nannhi si wusat ye nadan hasti

nae se naya bhed kahta gaya dil

na tha koi mabud par rafta rafta

KHud apna hi mabud banta gaya dil

nahin girya o KHanda mein farq koi

jo rota gaya dil to hansta gaya dil

bajae dil ek talKH aansu rahega

agar un ki mahfil mein aaya gaya dil

pareshan raha aap to fikr kya hai

mila jis se bhi us ko bahla gaya dil

kai raaz pinhan hain lekin khulenge

agar hashr ke roz pakDa gaya dil

bahut hum bhi chaalak bante the lekin

hamein baaton baaton mein bahka gaya dil

kahi baat jab kaam ki 'mira-ji' ne

wahin baat ko jhaT se palTa gaya dil