ek ek lamha guzara ja raha hai hosh mein

ek ik lamha guzārā jā rahā hai hosh meñ

ai zahe-qismat jo haiñ tūfān kī āġhosh meñ

ab ye aalam hai hamārā bandagī ke josh meñ

ek sajda be-ḳhudī meñ ek sajda hosh meñ

maslahat kuchh bhī na kahne de to is kā kyā ilaaj

jaane kitnī dāstāneñ haiñ lab-e-ḳhāmosh meñ

uf ye sailāb-e-havādis haa.e ye tūfān-e-ġham

yuuñ bhī laatā hogā dīvāne ko koī hosh meñ

Dar hai ahl-e-kārvāñ kī tezī-e-raftār se

apnī manzil bhī na kho baiTheñ kisī din josh meñ

sāmne mahshar ho yā kaunain chāhe kuchh bhī ho

un kā dīvāna to ab aatā nahīñ hai hosh meñ

'kaif' se pūchhe koī tere karam kī vus.ateñ

us ne dekhā hai do-ālam ko tirī āġhosh meñ

ek ek lamha guzara ja raha hai hosh mein

ai zahe-qismat jo hain tufan ki aaghosh mein

ab ye aalam hai hamara bandagi ke josh mein

ek sajda be-KHudi mein ek sajda hosh mein

maslahat kuchh bhi na kahne de to is ka kya ilaj

jaane kitni dastanen hain lab-e-KHamosh mein

uf ye sailab-e-hawadis hae ye tufan-e-gham

yun bhi lata hoga diwane ko koi hosh mein

Dar hai ahl-e-karwan ki tezi-e-raftar se

apni manzil bhi na kho baiThen kisi din josh mein

samne mahshar ho ya kaunain chahe kuchh bhi ho

un ka diwana to ab aata nahin hai hosh mein

'kaif' se puchhe koi tere karam ki wusaten

us ne dekha hai do-alam ko teri aaghosh mein