ye kahan se mauj-e-tarab uThi ki malal dil se nikal gae

ye kahāñ se mauj-e-tarab uThī ki malāl dil se nikal ga.e

vahī sub.h-o-shām jo the garāñ nafas-e-bahār meñ Dhal ga.e

ye dayār-e-shauq hai ham-nashīñ yahāñ laġhzishoñ meñ bhī husn hai

jo miTe vo aur ubhar ga.e jo gire vo aur sambhal ga.e

hasīñ zindagī kī talāsh thī hameñ sarḳhushī kī talāsh thī

hue zindagī se jo āshnā to jarāhatoñ se bahal ga.e

tire sogvāroñ kī zindagī kabhī mutma.in na guzar sakī

jo bujhī kabhī koī tishnagī ka.ī aur dard machal ga.e

mirī ārzūoñ ke ḳhvāb the ki fazā-e-husn-o-shabāb the

kahīñ nik.hatoñ meñ bikhar ga.e kahīñ rañg-o-nūr meñ Dhal ga.e

unheñ rāhatoñ kā ḳhayāl hai na sa.ūbatoñ kā malāl hai

jo tirī talāsh meñ chal paḌe jo tirī talab meñ nikal ga.e

hai bharī bahār to kyā karūñ na mile qarār to kyā karūñ

mire sāmne haiñ vo āshiyāñ jo bharī bahār meñ jal ga.e

ye kahan se mauj-e-tarab uThi ki malal dil se nikal gae

wahi subh-o-sham jo the garan nafas-e-bahaar mein Dhal gae

ye dayar-e-shauq hai ham-nashin yahan laghzishon mein bhi husn hai

jo miTe wo aur ubhar gae jo gire wo aur sambhal gae

hasin zindagi ki talash thi hamein sarKHushi ki talash thi

hue zindagi se jo aashna to jarahaton se bahal gae

tere sogwaron ki zindagi kabhi mutmain na guzar saki

jo bujhi kabhi koi tishnagi kai aur dard machal gae

meri aarzuon ke KHwab the ki faza-e-husn-o-shabab the

kahin nikhaton mein bikhar gae kahin rang-o-nur mein Dhal gae

unhen rahaton ka KHayal hai na saubaton ka malal hai

jo teri talash mein chal paDe jo teri talab mein nikal gae

hai bhari bahaar to kya karun na mile qarar to kya karun

mere samne hain wo aashiyan jo bhari bahaar mein jal gae