kis se izhaar-e-muddaa kije

kis se iz.hār-e-mudda.ā kiije

aap milte nahīñ haiñ kyā kiije

ho na paayā ye faisla ab tak

aap kiije to kyā kiyā kiije

aap the jis ke chāra-gar vo javāñ

saḳht bīmār hai duā kiije

ek hī fan to ham ne sīkhā hai

jis se miliye use ḳhafā kiije

hai taqāzā mirī tabī.at kā

har kisī ko charāġh-pā kiije

hai to baare ye ālam-e-asbāb

be-sabab chīḳhne lagā kiije

aaj ham kyā gila kareñ us se

gila-e-tañgī-e-qabā kiije

nutq haivān par garāñ hai abhī

guftugū kam se kam kiyā kiije

hazrat-e-zulf-e-ġhāliya-afshāñ

naam apnā sabā sabā kiije

zindagī kā ajab mo.āmla hai

ek lamhe meñ faisla kiije

mujh ko aadat hai ruuTh jaane kī

aap mujh ko manā liyā kiije

milte rahiye isī tapāk ke saath

bevafā.ī kī intihā kiije

kohkan ko hai ḳhud-kushī ḳhvāhish

shāh-bāno se iltijā kiije

mujh se kahtī thiiñ vo sharāb āñkheñ

aap vo zahr mat piyā kiije

rang har rang meñ hai dād-talab

ḳhuun thūkūñ to vāh-vā kiije

kis se izhaar-e-muddaa kije

aap milte nahin hain kya kije

ho na paya ye faisla ab tak

aap kije to kya kiya kije

aap the jis ke chaara-gar wo jawan

saKHt bimar hai dua kije

ek hi fan to hum ne sikha hai

jis se miliye use KHafa kije

hai taqaza meri tabiat ka

har kisi ko charagh-pa kije

hai to bare ye aalam-e-asbab

be-sabab chiKHne laga kije

aaj hum kya gila karen us se

gila-e-tangi-e-qaba kije

nutq haiwan par garan hai abhi

guftugu kam se kam kiya kije

hazrat-e-zulf-e-ghaaliya-afshan

nam apna saba saba kije

zindagi ka ajab moamla hai

ek lamhe mein faisla kije

mujh ko aadat hai ruTh jaane ki

aap mujh ko mana liya kije

milte rahiye isi tapak ke sath

bewafai ki intiha kije

kohkan ko hai KHud-kushi KHwahish

shah-bano se iltija kije

mujh se kahti thin wo sharab aankhen

aap wo zahr mat piya kije

rang har rang mein hai dad-talab

KHun thukun to wah-wa kije