dua ka TuTa hua harf sard aah mein hai

duā kā TuuTā huā harf sard aah meñ hai

tirī judā.ī kā manzar abhī nigāh meñ hai

tire badalne ke bā-vasf tujh ko chāhā hai

ye e'tirāf bhī shāmil mire gunāh meñ hai

azaab degā to phir mujh ko ḳhvāb bhī degā

maiñ mutma.in huuñ mirā dil tirī panāh meñ hai

bikhar chukā hai magar muskurā ke miltā hai

vo rakh rakhāo abhī mere kaj-kulāh meñ hai

jise bahār ke mehmān ḳhālī chhoḌ ga.e

vo ik makān abhī tak makīñ kī chaah meñ hai

yahī vo din the jab ik dūsre ko paayā thā

hamārī sāl-girah Thiik ab ke maah meñ hai

maiñ bach bhī jā.ūñ to tanhā.ī maar Dālegī

mire qabīle kā har fard qatl-gāh meñ hai

dua ka TuTa hua harf sard aah mein hai

teri judai ka manzar abhi nigah mein hai

tere badalne ke ba-wasf tujh ko chaha hai

ye e'tiraf bhi shamil mere gunah mein hai

azab dega to phir mujh ko KHwab bhi dega

main mutmain hun mera dil teri panah mein hai

bikhar chuka hai magar muskura ke milta hai

wo rakh rakhao abhi mere kaj-kulah mein hai

jise bahaar ke mehman KHali chhoD gae

wo ek makan abhi tak makin ki chah mein hai

yahi wo din the jab ek dusre ko paya tha

hamari sal-girah Thik ab ke mah mein hai

main bach bhi jaun to tanhai mar Dalegi

mere qabile ka har fard qatl-gah mein hai