duriyan simaTne mein der kuchh to lagti hai

dūriyāñ simaTne meñ der kuchh to lagtī hai

ranjishoñ ke miTne meñ der kuchh to lagtī hai

hijr ke dorāhe par ek pal na Thahrā vo

rāste badalne meñ der kuchh to lagtī hai

aañkh se na haTnā tum aañkh ke jhapakne tak

aañkh ke jhapakne meñ der kuchh to lagtī hai

hādisa bhī hone meñ vaqt kuchh to letā hai

baḳht ke bigaḌne meñ der kuchh to lagtī hai

ḳhushk bhī na ho paa.ī raushnā.ī harfoñ kī

jān-e-man mukarne meñ der kuchh to lagtī hai

fard kī nahīñ hai ye baat hai qabīle kī

gir ke phir sambhalne meñ der kuchh to lagtī hai

dard kī kahānī ko ishq ke fasāne ko

dāstān banñe meñ der kuchh to lagtī hai

dastakeñ bhī dene par dar agar na khultā ho

sīḌhiyāñ utarne meñ der kuchh to lagtī hai

ḳhvāhisheñ parindoñ se laakh miltī-jultī hoñ

dost par nikalne meñ der kuchh to lagtī hai

umr-bhar kī mohlat to vaqt hai ta.āruf kā

zindagī samajhne meñ der kuchh to lagtī hai

rañg yuuñ to hote haiñ bādaloñ ke andar hī

par dhanak ke banñe meñ der kuchh to lagtī hai

un kī aur phūloñ kī ek sī ridā.eñ haiñ

titliyāñ pakaḌne meñ der kuchh to lagtī hai

zalzale kī sūrat meñ ishq vaar kartā hai

sochne samajhne meñ der kuchh to lagtī hai

bhiiḌ vaqt letī hai rahnumā parakhne meñ

kārvān banñe meñ der kuchh to lagtī hai

ho chaman ke phūloñ kā yā kisī parī-vash kā

husn ke sañvarne meñ der kuchh to lagtī hai

mustaqil nahīñ 'amjad' ye dhuāñ muqaddar kā

lakḌiyāñ sulagne meñ der kuchh to lagtī hai

duriyan simaTne mein der kuchh to lagti hai

ranjishon ke miTne mein der kuchh to lagti hai

hijr ke dorahe par ek pal na Thahra wo

raste badalne mein der kuchh to lagti hai

aankh se na haTna tum aankh ke jhapakne tak

aankh ke jhapakne mein der kuchh to lagti hai

hadisa bhi hone mein waqt kuchh to leta hai

baKHt ke bigaDne mein der kuchh to lagti hai

KHushk bhi na ho pai raushnai harfon ki

jaan-e-man mukarne mein der kuchh to lagti hai

fard ki nahin hai ye baat hai qabile ki

gir ke phir sambhalne mein der kuchh to lagti hai

dard ki kahani ko ishq ke fasane ko

dastan banne mein der kuchh to lagti hai

dastaken bhi dene par dar agar na khulta ho

siDhiyan utarne mein der kuchh to lagti hai

KHwahishen parindon se lakh milti-julti hon

dost par nikalne mein der kuchh to lagti hai

umr-bhar ki mohlat to waqt hai taaruf ka

zindagi samajhne mein der kuchh to lagti hai

rang yun to hote hain baadalon ke andar hi

par dhanak ke banne mein der kuchh to lagti hai

un ki aur phulon ki ek si ridaen hain

titliyan pakaDne mein der kuchh to lagti hai

zalzale ki surat mein ishq war karta hai

sochne samajhne mein der kuchh to lagti hai

bhiD waqt leti hai rahnuma parakhne mein

karwan banne mein der kuchh to lagti hai

ho chaman ke phulon ka ya kisi pari-wash ka

husn ke sanwarne mein der kuchh to lagti hai

mustaqil nahin 'amjad' ye dhuan muqaddar ka

lakDiyan sulagne mein der kuchh to lagti hai