ehsas-e-husn ban ke nazar mein sama gae

ehsās-e-husn ban ke nazar meñ samā ga.e

go laakh duur the vo magar paas aa ga.e

ik raushnī sī dil meñ thī vo bhī nahīñ rahī

vo kyā ga.e charāġh-e-tamannā bujhā ga.e

dair o haram hai aur to hāsil na kuchh huā

sajde ġhurūr-e-ishq kī qīmat ghaTā ga.e

tanhā-ravī meñ yuuñ to musībat thī har qadam

ham ahl-e-kārvāñ se to pīchhā chhuḌā ga.e

kitnā fareb-kār hai ehsās-e-bandagī

ham manzil-e-ḳhudī se bahut duur aa ga.e

ulfat meñ fikr-e-zīst nadāmat kī baat thī

achchhe rahe jo jaan kī baazī lagā ga.e

jo haal un kā thā vo hamīñ jānte haiñ 'arsh'

yuuñ vo hamārī baat hañsī meñ uḌā ga.e

ehsas-e-husn ban ke nazar mein sama gae

go lakh dur the wo magar pas aa gae

ek raushni si dil mein thi wo bhi nahin rahi

wo kya gae charagh-e-tamanna bujha gae

dair o haram hai aur to hasil na kuchh hua

sajde ghurur-e-ishq ki qimat ghaTa gae

tanha-rawi mein yun to musibat thi har qadam

hum ahl-e-karwan se to pichha chhuDa gae

kitna fareb-kar hai ehsas-e-bandagi

hum manzil-e-KHudi se bahut dur aa gae

ulfat mein fikr-e-zist nadamat ki baat thi

achchhe rahe jo jaan ki bazi laga gae

jo haal un ka tha wo hamin jaante hain 'arsh'

yun wo hamari baat hansi mein uDa gae