ehsas mein phul khil rahe hain

ehsās meñ phuul khil rahe haiñ

patjhaḌ ke 'ajīb silsile haiñ

kuchh itnī shadīd tīrgī hai

āñkhoñ meñ sitāre tairte haiñ

dekheñ to havā jamī huī hai

socheñ to daraḳht jhūmte haiñ

suqrāt ne zahr pī liyā thā

ham ne jiine ke dukh sahe haiñ

ham tujh se bigaḌ ke jab bhī uTThe

phir tere huzūr aa ga.e haiñ

ham 'aks haiñ ek dūsre kā

chehre ye nahīñ haiñ aa.ine haiñ

lamhoñ kā ġhubār chhā rahā hai

yādoñ ke charāġh jal rahe haiñ

sūraj ne ghane sanobaroñ meñ

jaale se shu'ā'oñ ke bune haiñ

yaksāñ haiñ firāq-o-vasl donoñ

ye marhale ek se kaḌe haiñ

pā kar bhī to niiñd uḌ ga.ī thī

kho kar bhī to rat-jage mile haiñ

jo din tirī yaad meñ kaTe the

maazī ke khañDar bane khaḌe haiñ

jab terā jamāl DhūñDte the

ab terā ḳhayāl DhūñDte haiñ

ham dil ke gudāz se haiñ majbūr

jab ḳhush bhī hue to ro.e haiñ

ham zinda haiñ ai firāq kī raat

pyārī tire baal kyuuñ khule haiñ

ehsas mein phul khil rahe hain

patjhaD ke 'ajib silsile hain

kuchh itni shadid tirgi hai

aankhon mein sitare tairte hain

dekhen to hawa jami hui hai

sochen to daraKHt jhumte hain

suqraat ne zahr pi liya tha

hum ne jine ke dukh sahe hain

hum tujh se bigaD ke jab bhi uTThe

phir tere huzur aa gae hain

hum 'aks hain ek dusre ka

chehre ye nahin hain aaine hain

lamhon ka ghubar chha raha hai

yaadon ke charagh jal rahe hain

suraj ne ghane sanobaron mein

jale se shu'a'on ke bune hain

yaksan hain firaq-o-wasl donon

ye marhale ek se kaDe hain

pa kar bhi to nind uD gai thi

kho kar bhi to rat-jage mile hain

jo din teri yaad mein kaTe the

mazi ke khanDar bane khaDe hain

jab tera jamal DhunDte the

ab tera KHayal DhunDte hain

hum dil ke gudaz se hain majbur

jab KHush bhi hue to roe hain

hum zinda hain ai firaq ki raat

pyari tere baal kyun khule hain