sahr-e-gah-e-id mein daur-e-subu tha

sahr-e-gah-e-īd meñ daur-e-subū thā

par apne jaam meñ tujh bin lahū thā

ġhalat thā aap se ġhāfil guzarnā

na samjhe ham ki is qālib meñ tū thā

chaman kī vaz' ne ham ko kyā daaġh

ki har ġhuncha dil-e-pur-ārzū thā

gulo-ā.īnā kyā ḳhurshīd-o-mah kyā

jidhar dekhā tidhar terā hī rū thā

karoge yaad bāteñ to kahoge

ki koī rafta-e-bisyār-go thā

jahāñ par hai fasāne se hamāre

dimāġh-e-ishq ham ko bhī kabhū thā

magar dīvāna thā gul bhī kisū kā

ki pairāhan meñ so jaagā rafū thā

kahīñ kyā baal tere khul ga.e the

ki jhoñkā baav kā kuchh mushkbū thā

na dekhā 'mīr' āvāra ko lekin

ġhubār ik nā-tavāñ sā kū-ba-kū thā

sahr-e-gah-e-id mein daur-e-subu tha

par apne jam mein tujh bin lahu tha

ghalat tha aap se ghafil guzarna

na samjhe hum ki is qalib mein tu tha

chaman ki waz' ne hum ko kya dagh

ki har ghuncha dil-e-pur-arzu tha

gulo-aina kya KHurshid-o-mah kya

jidhar dekha tidhar tera hi ru tha

karoge yaad baaten to kahoge

ki koi rafta-e-bisyar-go tha

jahan par hai fasane se hamare

dimagh-e-ishq hum ko bhi kabhu tha

magar diwana tha gul bhi kisu ka

ki pairahan mein so jaga rafu tha

kahin kya baal tere khul gae the

ki jhonka baw ka kuchh mushkbu tha

na dekha 'mir' aawara ko lekin

ghubar ek na-tawan sa ku-ba-ku tha