ek din bhi to na apni raat nurani hui

ek din bhī to na apnī raat nūrānī huī

ham ko kyā ai mah-jabīñ gar chāñd-peshānī huī

sard-mehrī kā tirī saaqī natīja ye huā

aag ke moloñ jo biktī thī vo mai paanī huī

allāh allāh phuuT niklā rañg chāhat kā mirī

zahr khāyā maiñ ne poshāk aap kī dhānī huī

ham ko ho saktā nahīñ dhokā hujūm-e-hashr meñ

terī sūrat hai azal se jaanī pahchānī huī

le uḌī ghūñgaT ke andar se nigāh-e-mast hosh

aaj saaqī ne pilā.ī mai hameñ chhānī huī

jaan kar dushman jo lipTe jaan meñ jaañ aa ga.ī

bārak-allāh kis maze kī tum se nādānī huī

rafta rafta dīda-e-tar ko Duboyā ashk ne

paanī riste riste kashtī merī tūfānī huī

kar ga.ī dīvāngī ham ko barī har jurm se

chāk-dāmānī se apnī pāk-dāmānī huī

ḳhuun kī chādar mubārak bā-hayā talvār ko

myaan se bāhar nikal kar bhī na uryānī huī

raat ko chhup kar nikal jaatī hai āñkhoñ se 'jalīl'

sair dekho niiñd bhī kam-baḳht sailānī huī

ek din bhi to na apni raat nurani hui

hum ko kya ai mah-jabin gar chand-peshani hui

sard-mehri ka teri saqi natija ye hua

aag ke molon jo bikti thi wo mai pani hui

allah allah phuT nikla rang chahat ka meri

zahr khaya main ne poshak aap ki dhani hui

hum ko ho sakta nahin dhoka hujum-e-hashr mein

teri surat hai azal se jaani pahchani hui

le uDi ghungaT ke andar se nigah-e-mast hosh

aaj saqi ne pilai mai hamein chhani hui

jaan kar dushman jo lipTe jaan mein jaan aa gai

barak-allah kis maze ki tum se nadani hui

rafta rafta dida-e-tar ko Duboya ashk ne

pani riste riste kashti meri tufani hui

kar gai diwangi hum ko bari har jurm se

chaak-damani se apni pak-damani hui

KHun ki chadar mubarak ba-haya talwar ko

myan se bahar nikal kar bhi na uryani hui

raat ko chhup kar nikal jati hai aankhon se 'jalil'

sair dekho nind bhi kam-baKHt sailani hui