ek ek ghaDi uski qayamat ki ghaDi hai

ek ek ghaḌī us kī qayāmat kī ghaḌī hai

jo hijr meñ taḌpā.e vahī raat baḌī hai

ye zo.af kā aalam hai ki taqdīr kā likhā

bistar pe huuñ maiñ yā koī tasvīr paḌī hai

betābī-e-dil kā hai vo dilchasp tamāshā

jab dekho shab-e-hijr mire dar pe khaḌī hai

dekhā to zamāna gila-e-hijr se kam thā

samjhā thā ki furqat se shab-e-vasl baḌī hai

rone se hayā sham.a kī zāhir ho to kyuuñ kar

uryāñ hai magar beach meñ mahfil ke khaḌī hai

ab tak mujhe kuchh aur dikhā.ī nahīñ detā

kyā jāniye kis aañkh se ye aañkh laḌī hai

mar jā.ūñ jo maiñ vādī-e-ulfat meñ ajab kyā

maqsad hai mirā saḳht to manzil bhī kaḌī hai

kab aaoge vaqt aa gayā duniyā se safar kā

vaqfa hai koī dam kā na saa.at na ghaḌī hai

kad hai vo mujhe kuuch meñ aane nahīñ dete

apnā hai ḳhayāl un ko mujhe dil kī paḌī hai

himmat ko nazar pā nahīñ saktī kisī sūrat

dil koī baḌā hai jo koī aañkh baḌī hai

ai hashr numā.inda-e-raftār Thahar jā

us zulf ke sadqe jo tirī paañv paḌī hai

taḌpā diyā dil gūñdh ke gesū shab-e-vaslat

maiñ jāntā thā piiTh pe phūloñ kī chhaḌī hai

bālā-e-jabīñ ḳhuun jab aayā to araq kyā

ai jalva-gah-e-husn tirī dhuup kaḌī hai

aadhī se ziyāda shab-e-ġham kaaT chukā huuñ

ab bhī agar aa jaao to ye raat baḌī hai

ārā.ish-e-gesū ko hasīñ maañg rahe haiñ

'sāqib' kī ġhazal kyā koī motī kī laḌī hai

ek ek ghaDi us ki qayamat ki ghaDi hai

jo hijr mein taDpae wahi raat baDi hai

ye zoaf ka aalam hai ki taqdir ka likha

bistar pe hun main ya koi taswir paDi hai

betabi-e-dil ka hai wo dilchasp tamasha

jab dekho shab-e-hijr mere dar pe khaDi hai

dekha to zamana gila-e-hijr se kam tha

samjha tha ki furqat se shab-e-wasl baDi hai

rone se haya shama ki zahir ho to kyun kar

uryan hai magar beach mein mahfil ke khaDi hai

ab tak mujhe kuchh aur dikhai nahin deta

kya jaaniye kis aankh se ye aankh laDi hai

mar jaun jo main wadi-e-ulfat mein ajab kya

maqsad hai mera saKHt to manzil bhi kaDi hai

kab aaoge waqt aa gaya duniya se safar ka

waqfa hai koi dam ka na saat na ghaDi hai

kad hai wo mujhe kuch mein aane nahin dete

apna hai KHayal un ko mujhe dil ki paDi hai

himmat ko nazar pa nahin sakti kisi surat

dil koi baDa hai jo koi aankh baDi hai

ai hashr numainda-e-raftar Thahar ja

us zulf ke sadqe jo teri panw paDi hai

taDpa diya dil gundh ke gesu shab-e-waslat

main jaanta tha piTh pe phulon ki chhaDi hai

baala-e-jabin KHun jab aaya to araq kya

ai jalwa-gah-e-husn teri dhup kaDi hai

aadhi se ziyaada shab-e-gham kaT chuka hun

ab bhi agar aa jao to ye raat baDi hai

aaraish-e-gesu ko hasin mang rahe hain

'saqib' ki ghazal kya koi moti ki laDi hai