ek tariqa ye bhi hai jab jina ek na-chaari ho

ek tarīqa ye bhī hai jab jiinā ik nā-chārī ho

haath bañdhe hoñ siine par dil bai.at se inkārī ho

jashn-e-zafar ek aur safar kī saa.at kā dībācha hai

ḳhema-e-shab meñ raqs bhī ho aur kuuch kī bhī tayyārī ho

is se kam par ram-ḳhurdūñ kā kaun ta.āqub kartā hai

yā bānu-e-kū-e-avadh ho yā āhū-e-tatārī ho

daa.im hai sultānī ham shahzādoñ ḳhāk-nihādoñ kī

barq-o-sharar kī masnad ho yā taḳht-e-bād-e-bahārī ho

ham to raat kā matlab samjheñ ḳhvāb, sitāre, chāñd, charāġh

aage kā ahvāl vo jaane jis ne raat guzārī ho

ek tariqa ye bhi hai jab jina ek na-chaari ho

hath bandhe hon sine par dil baiat se inkari ho

jashn-e-zafar ek aur safar ki saat ka dibacha hai

KHema-e-shab mein raqs bhi ho aur kuch ki bhi tayyari ho

is se kam par ram-KHurdun ka kaun taaqub karta hai

ya banu-e-ku-e-awadh ho ya aahu-e-tatari ho

daim hai sultani hum shahzadon KHak-nihadon ki

barq-o-sharar ki masnad ho ya taKHt-e-baad-e-bahaari ho

hum to raat ka matlab samjhen KHwab, sitare, chand, charagh

aage ka ahwal wo jaane jis ne raat guzari ho