fareb-e-husn se gabr-o-musalman ka chalan bigDa

fareb-e-husn se gabr-o-musalmāñ kā chalan bigḌā

ḳhudā kī yaad bhūlā shaiḳh but se barhaman bigḌā

qabā-e-gul ko phāḌā jab mirā gul-pairahan bigḌā

ban aa.ī kuchh na ġhunche se jo vo ġhuncha-dahan bigḌā

nahīñ be-vaj.h hañsnā is qadar zaḳhm-e-shahīdāñ kā

tirī talvār kā muñh kuchh na kuchh ai teġh-zan bigḌā

takalluf kyā jo khoī jān-e-shīrīñ phoḌ kar sar ko

jo thī ġhairat to phir ḳhusrav se hotā kohkan bigḌā

kisī chashm-e-siyah kā jab huā sābit maiñ dīvāna

to mujh se sust hāthī kī tarah jañglī hiran bigḌā

asar iksīr kā yumn-e-qadam se terī paayā hai

jozāmī ḳhāk-e-rah mal kar banāte haiñ badan bigḌā

tirī taqlīd se kabk-e-darī ne Thokareñ khā.īñ

chalā jab jānvar insāñ kī chaal us kā chalan bigḌā

zavāl husn khilvātā hai meve kī qasam mujh se

lagāyā daaġh ḳhat ne aan kar seb-e-zaqan bigḌā

ruḳh-e-sāda nahīñ us shoḳh kā naqsh-e-adāvat se

nazar aate hī aapas meñ har ahl-e-anjuman bigḌā

jo bad-ḳhū tifl-e-ashk ai chashm-e-tar haiñ dekhnā ik din

gharauñde kī tarah se gumbad-e-charḳh-e-kuhan bigḌā

saf-e-mizhgāñ kī jumbish kā kiyā iqbāl ne kushta

shahīdoñ ke hue sālār jab ham se tuman bigḌā

kisī kī jab koī taqlīd kartā hai maiñ rotā huuñ

hañsā gul kī tarah ġhuncha jahāñ us kā dahan bigḌā

kamāl-e-dostī andesha-e-dushman nahīñ rakhtā

kisī bhañvre se kis din koī mār-e-yāsman bigḌā

rahī nafrat hamesha dāġh-e-uryānī ko phaa.e se

huā jab qat.a jaama par hamāre pairahan bigḌā

ragaḌvā.īñ ye mujh se eḌiyāñ ġhurbat meñ vahshat ne

huā masdūd rasta jāda-e-rāh-e-vatan bigḌā

kahā bulbul ne jab toḌā gul-e-sausan ko gulchīñ ne

ilāhī ḳhair kiijo nīl-e-ruḳhsār-e-chaman bigḌā

irāda mere khāne kā na ai zāġh-o-zaġhan kiijo

vo kushta huuñ jise sūñghe se kuttoñ kā badan bigḌā

amānat kī tarah rakkhā zamīñ ne roz-e-mahshar tak

na ik mū kam huā apnā na ik tār-e-kafan bigḌā

jahāñ ḳhālī nahīñ rahtā kabhī izā-dahindoñ se

huā nāsūr-e-nau paidā agar zaḳhm-e-kuhan bigḌā

tavañgar thā banī thī jab tak us mahbūb-e-ālam se

maiñ muflis ho gayā jis roz se vo sīm-tan bigḌā

lage muñh bhī chiḌhāne dete dete gāliyāñ sāhab

zabāñ bigḌī to bigḌī thī ḳhabar liije dahan bigḌā

banāvaT kaif-e-mai se khul ga.ī us shoḳh kī 'ātish'

lagā kar muñh se paimāne ko vo paimāñ-shikan bigḌā

fareb-e-husn se gabr-o-musalman ka chalan bigDa

KHuda ki yaad bhula shaiKH but se barhaman bigDa

qaba-e-gul ko phaDa jab mera gul-pairahan bigDa

ban aai kuchh na ghunche se jo wo ghuncha-dahan bigDa

nahin be-wajh hansna is qadar zaKHm-e-shahidan ka

teri talwar ka munh kuchh na kuchh ai tegh-zan bigDa

takalluf kya jo khoi jaan-e-shirin phoD kar sar ko

jo thi ghairat to phir KHusraw se hota kohkan bigDa

kisi chashm-e-siyah ka jab hua sabit main diwana

to mujh se sust hathi ki tarah jangli hiran bigDa

asar iksir ka yumn-e-qadam se teri paya hai

jozami KHak-e-rah mal kar banate hain badan bigDa

teri taqlid se kabk-e-dari ne Thokaren khain

chala jab jaanwar insan ki chaal us ka chalan bigDa

zawal husn khilwata hai mewe ki qasam mujh se

lagaya dagh KHat ne aan kar seb-e-zaqan bigDa

ruKH-e-sada nahin us shoKH ka naqsh-e-adawat se

nazar aate hi aapas mein har ahl-e-anjuman bigDa

jo bad-KHu tifl-e-ashk ai chashm-e-tar hain dekhna ek din

gharaunde ki tarah se gumbad-e-charKH-e-kuhan bigDa

saf-e-mizhgan ki jumbish ka kiya iqbaal ne kushta

shahidon ke hue salar jab hum se tuman bigDa

kisi ki jab koi taqlid karta hai main rota hun

hansa gul ki tarah ghuncha jahan us ka dahan bigDa

kamal-e-dosti andesha-e-dushman nahin rakhta

kisi bhanwre se kis din koi mar-e-yasman bigDa

rahi nafrat hamesha dagh-e-uryani ko phae se

hua jab qata jama par hamare pairahan bigDa

ragaDwain ye mujh se eDiyan ghurbat mein wahshat ne

hua masdud rasta jada-e-rah-e-watan bigDa

kaha bulbul ne jab toDa gul-e-sausan ko gulchin ne

ilahi KHair kijo nil-e-ruKHsar-e-chaman bigDa

irada mere khane ka na ai zagh-o-zaghan kijo

wo kushta hun jise sunghe se kutton ka badan bigDa

amanat ki tarah rakkha zamin ne roz-e-mahshar tak

na ek mu kam hua apna na ek tar-e-kafan bigDa

jahan KHali nahin rahta kabhi iza-dahindon se

hua nasur-e-nau paida agar zaKHm-e-kuhan bigDa

tawangar tha bani thi jab tak us mahbub-e-alam se

main muflis ho gaya jis roz se wo sim-tan bigDa

lage munh bhi chiDhane dete dete galiyan sahab

zaban bigDi to bigDi thi KHabar lije dahan bigDa

banawaT kaif-e-mai se khul gai us shoKH ki 'atish'

laga kar munh se paimane ko wo paiman-shikan bigDa