fasil-e-jism gira de makan-e-jaan se nikal

fasīl-e-jism girā de makān-e-jāñ se nikal

ye intishār-zada shahr hai yahāñ se nikal

tirī talāsh meñ phirte haiñ āftāb ka.ī

so ab ye farz hai tujh par ki sā.ebāñ se nikal

tamām shahr pe ik ḳhāmushī musallat hai

ab aisā kar ki kisī din mirī zabāñ se nikal

maqām-e-vasl to arz-o-samā ke biich meñ hai

maiñ is zamīn se niklūñ tū āsmāñ se nikal

maiñ apnī zaat meñ tārīkiyāñ sameTe huuñ

tū ik charāġh jalā aur ab yahāñ se nikal

kahā thā mujh se bhī ik din havā-e-sahrā ne

mirī panāh meñ aa jā ġhubār-e-jāñ se nikal

fasil-e-jism gira de makan-e-jaan se nikal

ye intishaar-zada shahr hai yahan se nikal

teri talash mein phirte hain aaftab kai

so ab ye farz hai tujh par ki saeban se nikal

tamam shahr pe ek KHamushi musallat hai

ab aisa kar ki kisi din meri zaban se nikal

maqam-e-wasl to arz-o-sama ke bich mein hai

main is zamin se niklun tu aasman se nikal

main apni zat mein tarikiyan sameTe hun

tu ek charagh jala aur ab yahan se nikal

kaha tha mujh se bhi ek din hawa-e-sahra ne

meri panah mein aa ja ghubar-e-jaan se nikal