fasil-e-shahr-e-tamanna mein dar banate hue

fasīl-e-shahr-e-tamannā meñ dar banāte hue

ye kaun dil meñ dar aayā hai ghar banāte hue

nasheb-e-chashm-e-tamāshā banā gayā mujh ko

kahīñ bulandi-e-ayyām par banāte hue

maiñ kyā kahūñ ki abhī koī pesh-raft nahīñ

guzar rahā huuñ abhī rahguzar banāte hue

kise ḳhabar hai ki kitne nujūm TuuT gire

shab-e-siyāh se rañg-e-sahar banāte hue

pate kī baat bhī muñh se nikal hī jaatī hai

kabhī kabhī koī jhūTī ḳhabar banāte hue

magar ye dil mirā ye tā.ir-e-bahisht mirā

utar hī aayā kahīñ mustaqar banāte hue

diloñ ke baab meñ kyā daḳhl 'āftāb-husain'

so baat phail ga.ī muḳhtasar banāte hue

fasil-e-shahr-e-tamanna mein dar banate hue

ye kaun dil mein dar aaya hai ghar banate hue

nasheb-e-chashm-e-tamasha bana gaya mujh ko

kahin bulandi-e-ayyam par banate hue

main kya kahun ki abhi koi pesh-raft nahin

guzar raha hun abhi rahguzar banate hue

kise KHabar hai ki kitne nujum TuT gire

shab-e-siyah se rang-e-sahar banate hue

pate ki baat bhi munh se nikal hi jati hai

kabhi kabhi koi jhuTi KHabar banate hue

magar ye dil mera ye tair-e-bahisht mera

utar hi aaya kahin mustaqar banate hue

dilon ke bab mein kya daKHl 'aftab-husain'

so baat phail gai muKHtasar banate hue