husn ho mera dil-nawaz husn ki dil-nawaz main

husn ho merā dil-navāz husn kī dil-navāz maiñ

mere uThā.eñ naaz vo us ke uThā.ūñ naaz maiñ

kaun huuñ aur kyā huuñ maiñ koī na ye samajh sakā

bazm-e-jahāñ meñ aate hī ban ga.ī ek raaz maiñ

husn meñ aur ishq meñ kaise nibhegī ai ḳhudā

husn jafā-shi.ār hai aur vafā-navāz maiñ

mere shab-e-firāq meñ kaash ajal ho mehmāñ

phir to tilism-e-zindagī khol duuñ terā raaz maiñ

ḳhūgar-e-ġham jo ho ga.ī is meñ mirā qusūr kyā

aap ne ġham diye mujhe ban ga.ī ġham-navāz maiñ

aaj vo mast-e-nāz jo dil meñ huā hai mehmāñ

ab ye jigar ko rashk hai bantā harīm-e-nāz maiñ

tujh meñ chhupī huī huuñ maiñ mujh meñ chhupā huā hai tū

saaz jo tū hai naġhma maiñ naġhma jo tū hai saaz maiñ

ban ke miTūñ to haañ miTūñ husn-e-shah-e-hijāz par

miT ke agar banūñ to huuñ ḳhāk-e-rah-e-hijāz maiñ

hech mirī nigāh meñ daulat-e-kā.enāt hai

kyūñki azal ke din se huuñ banda-e-be-niyāz maiñ

husn ho mera dil-nawaz husn ki dil-nawaz main

mere uThaen naz wo us ke uThaun naz main

kaun hun aur kya hun main koi na ye samajh saka

bazm-e-jahan mein aate hi ban gai ek raaz main

husn mein aur ishq mein kaise nibhegi ai KHuda

husn jafa-shiar hai aur wafa-nawaz main

mere shab-e-firaq mein kash ajal ho mehman

phir to tilism-e-zindagi khol dun tera raaz main

KHugar-e-gham jo ho gai is mein mera qusur kya

aap ne gham diye mujhe ban gai gham-nawaz main

aaj wo mast-e-naz jo dil mein hua hai mehman

ab ye jigar ko rashk hai banta harim-e-naz main

tujh mein chhupi hui hun main mujh mein chhupa hua hai tu

saz jo tu hai naghma main naghma jo tu hai saz main

ban ke miTun to han miTun husn-e-shah-e-hijaz par

miT ke agar banun to hun KHak-e-rah-e-hijaz main

hech meri nigah mein daulat-e-kaenat hai

kyunki azal ke din se hun banda-e-be-niyaz main