kaba banaiye na kalisa banaiye

ka.aba banā.iye na kalīsā banā.iye

dil ko tasavvurāt kī duniyā banā.iye

tasvīr-e-husn khīñchiye majnūñ ke bhes meñ

ā.īna-e-ḳhayāl ko lailā banā.iye

hirs-o-havā-e-dār-e-fanā se ġharaz nahīñ

duniyā se khoiye mujhe apnā banā.iye

dīvāngī-e-ishq ko rusvā na kījiye

lailā ko qais qais ko lailā banā.iye

hai fitrat-e-nazar kā taqāzā ye baar baar

muusā banā.iye mujhe muusā banā.iye

kyuuñ nazm-e-husn-o-ishq ko tabdīl kar diyā

kis ne kahā thā qais ko lailā banā.iye

pahle nazar ko tāqat-e-nazzāra dījiye

phir iḳhtiyār hai mujhe muusā banā.iye

sidq-o-safā ke sāñche meñ phir dil ko Dhaal kar

mehr-o-vafā kā gauhar-e-yaktā banā.iye

jal kar bhī soz-e-ishq meñ uf tak na kījiye

dil ko sukūn-o-zabt kā putlā banā.iye

'kulsūm' zindagī kā guzarnā muhāl hai

duniyā ko ik hasīn tamāshā banā.iye

kaba banaiye na kalisa banaiye

dil ko tasawwuraat ki duniya banaiye

taswir-e-husn khinchiye majnun ke bhes mein

aaina-e-KHayal ko laila banaiye

hirs-o-hawa-e-dar-e-fana se gharaz nahin

duniya se khoiye mujhe apna banaiye

diwangi-e-ishq ko ruswa na kijiye

laila ko qais qais ko laila banaiye

hai fitrat-e-nazar ka taqaza ye bar bar

musa banaiye mujhe musa banaiye

kyun nazm-e-husn-o-ishq ko tabdil kar diya

kis ne kaha tha qais ko laila banaiye

pahle nazar ko taqat-e-nazzara dijiye

phir iKHtiyar hai mujhe musa banaiye

sidq-o-safa ke sanche mein phir dil ko Dhaal kar

mehr-o-wafa ka gauhar-e-yakta banaiye

jal kar bhi soz-e-ishq mein uf tak na kijiye

dil ko sukun-o-zabt ka putla banaiye

'kulsum' zindagi ka guzarna muhaal hai

duniya ko ek hasin tamasha banaiye