mange hai ek sitara sar-e-asman phir

māñge hai ik sitāra sar-e-āsmān phir

dil ko ye zid ki sū-e-ufuq ho uḌaan phir

ab ai qafas nashīnoñ uThāo du'ā ko haath

hai shāḳh-shāḳh mausam-e-vahm-o-gumān phir

har lamha kis mahāz kī jānib safar meñ hai

khīñche hue ragoñ meñ lahū kī kamān phir

dariyāoñ kā ye chup to ḳhatarnāk hai bahut

bāñdho buland shāḳh pe logo machān phir

pahle ḳhirāj maañg rahā hai amīr-e-vaqt

lauTā.egā vo shahr meñ amn-o-amān phir

dil tang ho gayā to zamīñ bhī hui hai tang

ham ḳhvāb ke nagar meñ banā.eñ makān phir

in hichkiyoñ kā kuchh to sabab hogā 'kahkashāñ'

shāyad kisī ko aayā kahīñ merā dhyān phir

mange hai ek sitara sar-e-asman phir

dil ko ye zid ki su-e-ufuq ho uDan phir

ab ai qafas nashinon uThao du'a ko hath

hai shaKH-shaKH mausam-e-wahm-o-guman phir

har lamha kis mahaz ki jaanib safar mein hai

khinche hue ragon mein lahu ki kaman phir

dariyaon ka ye chup to KHatarnak hai bahut

bandho buland shaKH pe logo machan phir

pahle KHiraj mang raha hai amir-e-waqt

lauTaega wo shahr mein amn-o-aman phir

dil tang ho gaya to zamin bhi hui hai tang

hum KHwab ke nagar mein banaen makan phir

in hichkiyon ka kuchh to sabab hoga 'kahkashan'

shayad kisi ko aaya kahin mera dhyan phir