fikr hai shauq-e-kamar ishq-e-dahan paida karun

fikr hai shauq-e-kamar ishq-e-dahāñ paidā karūñ

chāhtā huuñ ek dil meñ do makāñ paidā karūñ

tab-e-ālī se agar auj-e-bayāñ paidā karūñ

maiñ zamīn-e-sher meñ bhī āsmāñ paidā karūñ

huuñ maiñ vo dil-soḳhta tāsīr-e-āh-e-garm se

gulshan-e-jannat meñ bhī daur-e-ḳhizāñ paidā karūñ

paañv kahte haiñ tire kūche meñ aa kar zo.af se

tū girā de aur maiñ ḳhvāb-e-girāñ paidā karūñ

ab bhī tum aao to maiñ āñkhoñ meñ bahr-e-yak-nazar

DhūñD kar thoḌī sī jān-e-nā-tavāñ paidā karūñ

maiñ huuñ ai 'taslīm' shāgird-e-'nasīm'-e-dahlavī

chāhiye ustād kā tarz-e-bayāñ paidā karūñ

fikr hai shauq-e-kamar ishq-e-dahan paida karun

chahta hun ek dil mein do makan paida karun

tab-e-ali se agar auj-e-bayan paida karun

main zamin-e-sher mein bhi aasman paida karun

hun main wo dil-soKHta tasir-e-ah-e-garm se

gulshan-e-jannat mein bhi daur-e-KHizan paida karun

panw kahte hain tere kuche mein aa kar zoaf se

tu gira de aur main KHwab-e-giran paida karun

ab bhi tum aao to main aankhon mein bahr-e-yak-nazar

DhunD kar thoDi si jaan-e-na-tawan paida karun

main hun ai 'taslim' shagird-e-'nasim'-e-dahlawi

chahiye ustad ka tarz-e-bayan paida karun