fikr hi Thahri to dil ko fikr-e-KHuban kyun na ho

fikr hī Thahrī to dil ko fikr-e-ḳhūbāñ kyuuñ na ho

ḳhaak honā hai to ḳhāk-e-kū-e-jānāñ kyuuñ na ho

dahr meñ ai ḳhvāja Thahrī jab asīrī nā-guzīr

dil asīr-e-halqa-e-gesū-e-pechāñ kyuuñ na ho

ziist hai jab mustaqil āvāragardī hī kā naam

aql vaalo phir tavāf-e-kū-e-jānāñ kyuuñ na ho

jab nahīñ mastūriyoñ meñ bhī gunāhoñ se najāt

dil khule bandoñ ġharīq-e-bahr-e-isyāñ kyuuñ na ho

ik na ik hañgāme par mauqūf hai jab zindagī

mai-kade meñ rind raqsāñ o ġhazal-ḳhvāñ kyuuñ na ho

jab ḳhush o nā-ḳhush kisī ke haath meñ denā hai haath

ham-nashīñ phir bai.at-e-jām-e-zar-afshāñ kyuuñ na ho

jab bashar kī dastaras se duur hai hablul-matīñ

dasht-e-vahshat meñ phir ik kāfir kā dāmāñ kyuuñ na ho

ek hai jab shor-e-jahl o bāñg-e-hikmat kā ma.aal

dil halāk-e-zauq-e-gulbāñg-e-pareshāñ kyuuñ na ho

ik na ik rif.at ke aage sajda lāzim hai to phir

aadmī mahv-e-sujūd-e-sarv-e-ḳhūbāñ kyuuñ na ho

ik na ik phande hī meñ phañsnā hai jab insān ko

dosh par dām-e-siyāh-e-sumbulistāñ kyuuñ na ho

jab fareboñ meñ hī rahnā hai to ai ahl-e-ḳhirad

lazzat-e-paimān bār-e-sust-paimāñ kyuuñ na ho

yaañ jab āvezish hī Thahrī hai to zarre chhoḌ kar

aadmī ḳhurshīd se dast-o-garebāñ kyuuñ na ho

ik na ik zulmat se jab vābasta rahnā hai to 'josh'

zindagī par sāya-e-zulf-e-pareshāñ kyuuñ na ho

fikr hi Thahri to dil ko fikr-e-KHuban kyun na ho

KHak hona hai to KHak-e-ku-e-jaanan kyun na ho

dahr mein ai KHwaja Thahri jab asiri na-guzir

dil asir-e-halqa-e-gesu-e-pechan kyun na ho

zist hai jab mustaqil aawaragardi hi ka nam

aql walo phir tawaf-e-ku-e-jaanan kyun na ho

jab nahin masturiyon mein bhi gunahon se najat

dil khule bandon ghariq-e-bahr-e-isyan kyun na ho

ek na ek hangame par mauquf hai jab zindagi

mai-kade mein rind raqsan o ghazal-KHwan kyun na ho

jab KHush o na-KHush kisi ke hath mein dena hai hath

ham-nashin phir baiat-e-jam-e-zar-afshan kyun na ho

jab bashar ki dastaras se dur hai hablul-matin

dasht-e-wahshat mein phir ek kafir ka daman kyun na ho

ek hai jab shor-e-jahl o bang-e-hikmat ka maal

dil halak-e-zauq-e-gulbang-e-pareshan kyun na ho

ek na ek rifat ke aage sajda lazim hai to phir

aadmi mahw-e-sujud-e-sarw-e-KHuban kyun na ho

ek na ek phande hi mein phansna hai jab insan ko

dosh par dam-e-siyah-e-sumbulistan kyun na ho

jab farebon mein hi rahna hai to ai ahl-e-KHirad

lazzat-e-paiman bar-e-sust-paiman kyun na ho

yan jab aawezish hi Thahri hai to zarre chhoD kar

aadmi KHurshid se dast-o-gareban kyun na ho

ek na ek zulmat se jab wabasta rahna hai to 'josh'

zindagi par saya-e-zulf-e-pareshan kyun na ho