firaq-e-yar ne bechain mujhko raat bhar rakkha

firāq-e-yār ne bechain mujh ko raat bhar rakkhā

kabhī takiya idhar rakkhā kabhī takiya idhar rakkhā

shikast-e-dil kā baaqī ham ne ġhurbat meñ asar rakhā

likhā ahl-e-vatan ko ḳhat to ik gosha katar rakkhā

barābar aa.ine ke bhī na samjhe qadr vo dil kī

ise zer-e-qadam rakkhā use pesh-e-nazar rakkhā

miTā.e dīda-o-dil donoñ mere ashk-e-ḳhūnīñ ne

'ajab ye tifl abtar thā na ghar rakkhā na dar rakkhā

tumhāre sang-e-dar kā ek TukḌā bhī jo haath aayā

aziiz aisā kiyā mar kar use chhātī pe dhar rakkhā

jināñ meñ saath apne kyuuñ na le jā.ūñgā nāseh ko

sulūk aisā hī mere saath hai hazrat ne kar rakkhā

na kī kis ne sifārish merī vaqt-e-qatl qātil se

kamāñ ne haath joḌe teġh ne qadmoñ pe sar rakkhā

ġhazab barse vo mere aate hī mā'lūm hotā hai

jagah ḳhālī jo paa.ī yaar ko ġhairoñ ne bhar rakkhā

baḌā ehsāñ hai mere sar pe us kī laġhzish-e-pā kā

ki is ne be-tahāshā haath mere dosh par rakkhā

zamīñ meñ dāna-e-gandum sadaf meñ ham hue gauhar

hamāre ijz ne har ma.arka meñ ham ko dar rakkhā

tire har naqsh-e-pā ko rahguzar meñ sajda-gah samjhe

jahāñ tū ne qadam rakkhā vahāñ maiñ ne bhī sar rakkhā

amiir achchhā shagūn-e-mai kiyā saaqī kī furqat meñ

jo barsā abr-e-rahmat jā-e-mai shīshoñ meñ bhar rakkhā

firaq-e-yar ne bechain mujh ko raat bhar rakkha

kabhi takiya idhar rakkha kabhi takiya idhar rakkha

shikast-e-dil ka baqi hum ne ghurbat mein asar rakha

likha ahl-e-watan ko KHat to ek gosha katar rakkha

barabar aaine ke bhi na samjhe qadr wo dil ki

ise zer-e-qadam rakkha use pesh-e-nazar rakkha

miTae dida-o-dil donon mere ashk-e-KHunin ne

'ajab ye tifl abtar tha na ghar rakkha na dar rakkha

tumhaare sang-e-dar ka ek TukDa bhi jo hath aaya

aziz aisa kiya mar kar use chhati pe dhar rakkha

jinan mein sath apne kyun na le jaunga naseh ko

suluk aisa hi mere sath hai hazrat ne kar rakkha

na ki kis ne sifarish meri waqt-e-qatl qatil se

kaman ne hath joDe tegh ne qadmon pe sar rakkha

ghazab barse wo mere aate hi ma'lum hota hai

jagah KHali jo pai yar ko ghairon ne bhar rakkha

baDa ehsan hai mere sar pe us ki laghzish-e-pa ka

ki is ne be-tahasha hath mere dosh par rakkha

zamin mein dana-e-gandum sadaf mein hum hue gauhar

hamare ijz ne har marka mein hum ko dar rakkha

tere har naqsh-e-pa ko rahguzar mein sajda-gah samjhe

jahan tu ne qadam rakkha wahan main ne bhi sar rakkha

amir achchha shagun-e-mai kiya saqi ki furqat mein

jo barsa abr-e-rahmat ja-e-mai shishon mein bhar rakkha