firaq se bhi gae hum visal se bhi gae

firāq se bhī ga.e ham visāl se bhī ga.e

subuk hue haiñ to aish-e-malāl se bhī ga.e

jo but-kade meñ the vo sāhibān-e-kashf-o-kamāl

haram meñ aa.e to kashf-o-kamāl se bhī ga.e

usī nigāh kī narmī se Dagmagā.e qadam

usī nigāh ke tevar sambhāl se bhī ga.e

ġham-e-hayāt o ġham-e-dost kī kashākash meñ

ham aise log to rañj-o-malāl se bhī ga.e

gul o samar kā to ronā alag rahā lekin

ye ġham ki farq-e-harām-o-halāl se bhī ga.e

vo log jin se tirī bazm meñ the hañgāme

ga.e to kyā tirī bazm-e-ḳhayāl se bhī ga.e

ham aise kaun the lekin qafas kī ye duniyā

ki par-shikastoñ meñ apnī misāl se bhī ga.e

charāġh-e-bazm abhī jān-e-anjuman na bujhā

ki ye bujhā to tire ḳhatt-o-ḳhāl se bhī ga.e

firaq se bhi gae hum visal se bhi gae

subuk hue hain to aish-e-malal se bhi gae

jo but-kade mein the wo sahiban-e-kashf-o-kamal

haram mein aae to kashf-o-kamal se bhi gae

usi nigah ki narmi se Dagmagae qadam

usi nigah ke tewar sambhaal se bhi gae

gham-e-hayat o gham-e-dost ki kashakash mein

hum aise log to ranj-o-malal se bhi gae

gul o samar ka to rona alag raha lekin

ye gham ki farq-e-haram-o-halal se bhi gae

wo log jin se teri bazm mein the hangame

gae to kya teri bazm-e-KHayal se bhi gae

hum aise kaun the lekin qafas ki ye duniya

ki par-shikaston mein apni misal se bhi gae

charagh-e-bazm abhi jaan-e-anjuman na bujha

ki ye bujha to tere KHatt-o-KHal se bhi gae