ganw se guzrega aur miTTi ke ghar le jaega

gaañv se guzregā aur miTTī ke ghar le jā.egā

ek din dariyā sabhī dīvār o dar le jā.egā

ghar kī tanhā.ī meñ yuuñ mahsūs hotā hai mujhe

jaise koī mujh ko mujh se chhīn kar le jā.egā

kaun degā us ko merī tah-nashīnī kā patā

kaun mere Duub jaane kī ḳhabar le jā.egā

aa.ine vīrāñ-nigāhī kā sabab ban jā.eñge

ḳhud-pasandī kā junūñ tāb-e-nazar le jā.egā

sub.h ke siine se phūTegī shuā-e-mehr-e-nau

sab añdhere raat ke dast-e-sahar le jā.egā

jazba-e-johd-e-musalsal hai binā-e-zindagī

ye gayā to saarā jiine kā hunar le jā.egā

ganw se guzrega aur miTTi ke ghar le jaega

ek din dariya sabhi diwar o dar le jaega

ghar ki tanhai mein yun mahsus hota hai mujhe

jaise koi mujh ko mujh se chhin kar le jaega

kaun dega us ko meri tah-nashini ka pata

kaun mere Dub jaane ki KHabar le jaega

aaine viran-nigahi ka sabab ban jaenge

KHud-pasandi ka junun tab-e-nazar le jaega

subh ke sine se phuTegi shua-e-mehr-e-nau

sab andhere raat ke dast-e-sahar le jaega

jazba-e-johd-e-musalsal hai bina-e-zindagi

ye gaya to sara jine ka hunar le jaega