ghair ko munh laga ke dekh liya

ġhair ko muñh lagā ke dekh liyā

jhuuT sach aazmā ke dekh liyā

un ke ghar 'dāġh' jā ke dekh liyā

dil ke kahne meñ aa ke dekh liyā

kitnī farhat-fazā thī bū-e-vafā

us ne dil ko jalā ke dekh liyā

kabhī ġhash meñ rahā shab-e-va.ada

kabhī gardan uThā ke dekh liyā

jins-e-dil hai ye vo nahīñ saudā

har jagah se mañgā ke dekh liyā

log kahte haiñ chup lagī hai tujhe

hāl-e-dil bhī sunā ke dekh liyā

jaao bhī kyā karoge mehr-o-vafā

bār-hā aazmā ke dekh liyā

zaḳhm-e-dil meñ nahīñ hai qatra-e-ḳhūñ

ḳhuub ham ne dikhā ke dekh liyā

idhar ā.īna hai udhar dil hai

jis ko chāhā uThā ke dekh liyā

un ko ḳhalvat-sarā meñ be-parda

saaf maidān pā ke dekh liyā

us ne sub.h-e-shab-e-visāl mujhe

jaate jaate bhī aa ke dekh liyā

tum ko hai vasl-e-ġhair se inkār

aur jo ham ne aa ke dekh liyā

'dāġh' ne ḳhuub āshiqī kā mazā

jal ke dekhā jalā ke dekh liyā

ghair ko munh laga ke dekh liya

jhuT sach aazma ke dekh liya

un ke ghar 'dagh' ja ke dekh liya

dil ke kahne mein aa ke dekh liya

kitni farhat-faza thi bu-e-wafa

us ne dil ko jala ke dekh liya

kabhi ghash mein raha shab-e-wada

kabhi gardan uTha ke dekh liya

jins-e-dil hai ye wo nahin sauda

har jagah se manga ke dekh liya

log kahte hain chup lagi hai tujhe

haal-e-dil bhi suna ke dekh liya

jao bhi kya karoge mehr-o-wafa

bar-ha aazma ke dekh liya

zaKHm-e-dil mein nahin hai qatra-e-KHun

KHub hum ne dikha ke dekh liya

idhar aaina hai udhar dil hai

jis ko chaha uTha ke dekh liya

un ko KHalwat-sara mein be-parda

saf maidan pa ke dekh liya

us ne subh-e-shab-e-visal mujhe

jate jate bhi aa ke dekh liya

tum ko hai wasl-e-ghair se inkar

aur jo hum ne aa ke dekh liya

'dagh' ne KHub aashiqi ka maza

jal ke dekha jala ke dekh liya